മുംബൈ: കളിക്കുന്നതിനിടെ, അബദ്ധത്തില്‍ ബലൂണ്‍ വിഴുങ്ങിയ നാലുവയസുകാരന് മരിച്ചു. ബലൂണ്‍ തൊണ്ടയില്‍ കുരുങ്ങിയാണ് മരണം സംഭവിച്ചത്.
മുംബൈ അന്ധേരിയില്‍ ഞായറാഴ്ചയാണ് സംഭവം. വീട്ടില്‍ സഹോദരിയോടൊപ്പം കളിക്കുന്നതിനിടെയാണ് അപകടം ഉണ്ടായത്. ബലൂണ്‍ വീര്‍പ്പിച്ചും കാറ്റ് ഊതി കളഞ്ഞുമാണ് കുട്ടികള്‍ കളിച്ചിരുന്നത്. ഇതിനിടയിലാണ് നാലു വയസുള്ള ദേവരാജിന്റെ തൊണ്ടയില്‍ ബലൂണ്‍ കുരുങ്ങിയത്.
തുടക്കത്തില്‍ ഇരുന്ന് കളിക്കുകയായിരുന്നു ദേവരാജ്. കളിക്കിടെ താഴെ കിടന്നും കുട്ടി ബലൂണ്‍ വീര്‍പ്പിക്കുന്നത് തുടര്‍ന്നു. അതിനിടെയാണ് അബദ്ധത്തില്‍ ബലൂണ്‍ വിഴുങ്ങിയത്. തൊണ്ടയില്‍ കുരുങ്ങിയ ബലൂണ്‍ പുറത്തെടുക്കാന്‍ മാതാപിതാക്കള്‍ ശ്രമിച്ചെങ്കിലും സാധിച്ചില്ല.
തുടര്‍ന്ന് തൊട്ടടുത്തെ ആശുപത്രിയില്‍ കൊണ്ടുപോയെങ്കിലും ജീവന്‍ രക്ഷിക്കാനായില്ല. പോകുന്ന വഴി ബോധം നഷ്ടപ്പെട്ട് ഗുരുതരാവസ്ഥയിലായ കുട്ടിയെ വിദഗ്ധ ചികിത്സയ്ക്കായി മറ്റൊരു ആശുപത്രിയില്‍ കൊണ്ടുപോകാന്‍ അന്ധേരിയിലെ ആശുപത്രി അധികൃതര്‍ പറഞ്ഞു. ഇതനുസരിച്ച്് നാനാവതി ആശുപത്രിയില്‍ കൊണ്ടുപോകുന്ന വഴിയാണ് മരണം സംഭവിച്ചത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ