ന്യൂഡല്‍ഹി : രാജ്യത്ത് കോവിഡ് രോഗവ്യാപനം ഏറ്റവും രൂക്ഷമായ നഗരമായി ചെന്നൈ മാറി. ഏപ്രില്‍-മെയ് മാസങ്ങളില്‍ മുംബൈ ആയിരുന്നു ഒരുദിവസം രാജ്യത്ത് ഏറ്റവും അധികം കോവിഡ് രോഗബാധ സ്ഥിരീകരിച്ചിരുന്നത്. എന്നാല്‍ ജൂണ്‍ ആയതോടെ മുംബൈയെ മറികടന്ന് ഡല്‍ഹി ഒന്നാമതെത്തി.

എന്നാല്‍ ജൂണ്‍ 30 ലെ കണക്കുപ്രകാരം മുംബൈയെയും ഡല്‍ഹിയെയും മറികടന്ന് രോഗവ്യാപനത്തില്‍ ചെന്നൈ ഒന്നാമതെത്തുകയായിരുന്നു. ജൂണ്‍ 30 ന് ചെന്നൈയില്‍ സ്ഥിരീകരിച്ചത് 2400 പുതിയ കോവിഡ് കേസുകളാണ്. ഡല്‍ഹിയിലാകട്ടെ സ്ഥിരീകരിച്ചത് 2200 കേസുകളും.

ഒരു ദിവസം കോവിഡ് സ്ഥിരീകരിക്കുന്നതില്‍ ലോകത്തുതന്നെ രണ്ടാം സ്ഥാനത്തെത്തി ഇതോടെ ചെന്നൈ. അമേരിക്കയിലെ ലോസ് ആഞ്ചലസാണ് ചെന്നൈയ്ക്ക് മുമ്പില്‍ ഒന്നാമതെത്തിയത്. 3000 ഓളം പേര്‍ക്കാണ് ജൂണ്‍ 30 ന് ലോസ് ആഞ്ചലസില്‍ കോവിഡ് സ്ഥിരീകരിച്ചത്.

ജൂണ്‍ 30 ന് ഏറ്റവും കൂടുതല്‍ കോവിഡ് കേസുകള്‍ സ്ഥിരീകരിച്ച ലോകത്തെ നഗരങ്ങളുടെ പട്ടിക ഇങ്ങനെയാണ്. ലോസ് ഏഞ്ചലസ് ( അമേരിക്ക), ചെന്നൈ, സാന്റിയാഗോ ( ചിലി), ഡല്‍ഹി, സാവോ പോളോ ( ബ്രസീല്‍), താനെ, മിയാമി ഡാഡെ കൗണ്ടി ( അമേരിക്ക), ബ്യൂണസ് അയേഴ്‌സ് ( അര്‍ജന്റീന), സാല്‍വദോര്‍ ( ബ്രസീല്‍), ലിമ( പെറു) എന്നിങ്ങനെയാണ്.