ന്യൂഡൽഹി: 2017നും 19നുമിടയിൽ ഓടുന്ന ട്രെയിനുകളിൽ നടന്നത് 29 ബലാത്സംഗങ്ങൾ. ഇക്കാലയളവിൽ റെയിൽവേ സ്റ്റേഷൻ പരിസരത്ത് 136 ബലാത്സംഗങ്ങളും നടന്നു. വിവരാവകാശ നിയമം വഴിയുള്ള ചോദ്യത്തിന് ലഭിച്ച മറുപടിയിലാണ് കണക്കുകൾ.

ചന്ദ്രശേഖർ ഗൗർ എന്ന വിവരാവകാശ പ്രവർത്തകനാണ് വിവരാവകാശ നിയമ പ്രകാരം കണക്കുകൾ ലഭിച്ചത്. ഇക്കാലയളവിൽ സ്ത്രീകൾക്കു നേരെ 1672 മറ്റ് അതിക്രമങ്ങളുമുണ്ടായി. ഇതിൽ 802 എണ്ണം റെയിൽവേ പരിസരത്തും ബാക്കിയുള്ളവ ഓടിക്കൊണ്ടിരിക്കുന്ന ട്രെയിനുകളിലുമാണ്.

2017ൽ 51 ബലാത്സംഗങ്ങളാണ് റിപ്പോർട്ട് ചെയ്തത്. ഇതിൽ 41 എണ്ണം റെയിൽവേ പരിസരത്തും 10 എണ്ണം ഓടുന്ന ട്രെയിനുകളിലുമാണ്. 2018-ൽ റിപ്പോർട്ടു ചെയ്ത 70 ബലാത്സംഗങ്ങളിൽ പതിനൊന്നെണ്ണം ഓടുന്ന ട്രെയിനുകളിൽ നടന്നവയാണ്. 2019-ൽ റിപ്പോർട്ടു ചെയ്ത 44 കേസുകളിൽ 36 എണ്ണം റെയിൽവേ പരിസരത്തും എട്ടെണ്ണം ട്രെയിനുകളിലുമായാണ്.

ഈ മൂന്ന് വർഷത്തിനുള്ളിൽ, 771 തട്ടിക്കൊണ്ടു പോകൽ, 4718 കവർച്ച, 213 കൊലപാതക ശ്രമങ്ങൾ, 542 കൊലപാതകങ്ങൾ എന്നിവയും റിപ്പോർട്ടു ചെയ്തു. അപായ സാധ്യത കൂടുതലുള്ള പാതകളിലോടുന്ന 2,200 ട്രെയിനുകളിൽ സ്ത്രീ സുരക്ഷയ്ക്കായി റെയിൽവേയുടെ സേവനമുണ്ട്. കൂടാതെ, 182 എന്ന സുരക്ഷാ ഫോൺ നമ്പർ മുഴുവൻ സമയവും പ്രവർത്തിക്കുന്നുണ്ടെന്നും റെയിൽവേ അറിയിച്ചു.