ന്യൂഡല്‍ഹി : രാജ്യത്ത് കോവിഡ് രോഗബാധയില്‍ വന്‍ വര്‍ധന. 24 മണിക്കൂറിനിടെ 5242 പേര്‍ക്കാണ് രാജ്യത്ത് കോവിഡ് സ്ഥിരീകരിച്ചത്. ഒരു ദിവസം 5000 ലേറെ കോവിഡ് രോഗബാധ സ്ഥിരീകരിക്കുന്നത് രാജ്യത്ത് ഇതാദ്യമായാണ്. ഇതോടെ ഇന്ത്യയിലെ ആകെ കോവിഡ് ബാധിതരുടെ എണ്ണം 96,169 ആയി ഉയര്‍ന്നു. 

ഇന്നലെ മാത്രം 157 പേര്‍ക്കാണ് കോവിഡ് ബാധിച്ച് ജീവന്‍ നഷ്ടപ്പെട്ടത്. ഇതോടെ മരണം മൂവായിരം കടന്നു. മരണസംഖ്യ 3029ആയി. മഹാരാഷ്ട്രയില്‍ സ്ഥിതി അതീവ ഗുരുതരമാണ്. മുംബൈയില്‍ മാത്രം കോവിഡ് ബാധിതരുടെ എണ്ണം 20,000ലെത്തി. 

തമിഴ്‌നാട്, ഗുജറാത്ത്, ഡല്‍ഹി സംസ്ഥാനങ്ങളിലും കോവിഡ് ബാധിതരുടെ എണ്ണത്തില്‍ വന്‍ വര്‍ധനയാണ്. കോവിഡ് വ്യാപനം രൂക്ഷമാകുന്ന പശ്ചാത്തലത്തില്‍ കേന്ദ്രസര്‍ക്കാര്‍ ലോക്ക്ഡൗണ്‍ വീണ്ടും നീട്ടിയിട്ടുണ്ട്. മെയ് 31 വരെയാണ് നാലാംഘട്ട ലോക്ക്ഡൗണ്‍ നീട്ടിയത്.