ലക്‌നൗ: തല്ലാനും കൊല്ലാനും പ്രതിഫല നിരക്ക് നിശ്ചയിച്ച് കൊണ്ടുള്ള ഗുണ്ടാ സംഘത്തിന്റെ പട്ടിക പുറത്ത്. ഭീഷണിക്ക് ആയിരം, തല്ലാന്‍ 5000, കൊലപാതകത്തിന് 55,000 എന്നിങ്ങനെ അക്രമപ്രവര്‍ത്തനങ്ങള്‍ക്ക് നിരക്ക് നിശ്ചയിച്ച് കൊണ്ടുള്ള പട്ടികയാണ് സോഷ്യല്‍മീഡിയയില്‍ അടക്കം വ്യാപകമായി പ്രചരിക്കുന്നത്.

ഉത്തര്‍പ്രദേശ് മുസഫര്‍നഗറിലെ അക്രമിസംഘത്തിന്റെ പേരിലാണ് വിവാദ റേറ്റ് ചാര്‍ട്ട് പ്രചരിക്കുന്നത്. തോക്ക് പിടിച്ചുനില്‍ക്കുന്ന ചിത്രം സഹിതമുള്ള റേറ്റ് ചാര്‍ട്ട് ഒരു യുവാവാണ് സോഷ്യല്‍മീഡിയയില്‍ പങ്കുവെച്ചത്. തട്ടിക്കൊണ്ടുപോകല്‍, ഭീഷണി, കൊലപാതകം എന്നിവ പ്രതിഫലം വാങ്ങി ചെയ്ത് നല്‍കും എന്ന് പറഞ്ഞ് കൊണ്ടായിരുന്നു പോസ്റ്റ്. 

ഭീഷണിക്ക് ആയിരം രൂപയാണ് ചാര്‍ട്ടില്‍ നല്‍കിയിരിക്കുന്നത്.മര്‍ദ്ദനത്തിന് 5000 രൂപയാണ് ഈടാക്കുക. കൊലപാതകത്തിന് പ്രതിഫലമായി 55,000 രൂപ നല്‍കണമെന്നും ചാര്‍ട്ടില്‍ പറയുന്നു. സംഭവം വിവാദമായതോടെ പൊലീസ് പ്രതികള്‍ക്കായി തെരച്ചില്‍ ആരംഭിച്ചിട്ടുണ്ട്.