ന്യൂഡല്‍ഹി: കാമുകന്റെ കൊലപാതകത്തില്‍ 24കാരിയും സഹോദരനും ഉള്‍പ്പെടെ മൂന്ന് പേര്‍ അറസ്റ്റില്‍. സിസിടിവി ദൃശ്യങ്ങളുടെ സഹായത്തോടെയാണ് പ്രതികളെ പിടികൂടിയത്.
വെളളിയാഴ്ച വടക്കന്‍ ഡല്‍ഹിയിലാണ് സംഭവം. 23 കാരനായ സഹില്‍ ആണ് കൊല്ലപ്പെട്ടത്. യുവാവ് അബോധാവസ്ഥയില്‍ കിടക്കുന്നു എന്ന് വിവരത്തിന്റെ അടിസ്ഥാനത്തില്‍ ഡല്‍ഹി പൊലീസ് സംഭവസ്ഥലത്ത് എത്തുകയായിരുന്നു. കഴുത്തിലെ പരിക്കേറ്റ പാടില്‍ സംശയം തോന്നിയ പൊലീസ് നടത്തിയ വിശദമായ അന്വേഷണത്തിലാണ് പ്രതികള്‍ കുടുങ്ങിയത്.
പ്രദേശത്തെ സിസിടിവി ദൃശ്യങ്ങള്‍ പരിശോധിച്ചപ്പോഴാണ് വര്‍ഷയും സഹോദരനും കൂട്ടാളിയും ചേര്‍ന്നാണ് കൊലപാതകം നടത്തിയതെന്ന് തെളിഞ്ഞത്. സിസിടിവി ദൃശ്യങ്ങള്‍ കണ്ട കാമുകന്റെ ബന്ധുക്കള്‍ വര്‍ഷയും സഹോദരനെയും തിരിച്ചറിയുകയായിരുന്നുവെന്ന് പൊലീസ് പറയുന്നു.
വര്‍ഷയെ കാണാന്‍ വന്ന സഹിലിനെ മൂവരും ചേര്‍ന്ന് കൊലപ്പെടുത്തുകയായിരുന്നു. ഈ സമയത്ത് സഹോദരനും കൂട്ടാളിയും മദ്യപിക്കുകയായിരുന്നു. വര്‍ഷയുമായി അടുത്ത് ഇടപഴകാന്‍ ശ്രമിച്ച സഹിലിനെ സഹോദരന് തടഞ്ഞു. ഇതേതുടര്‍ന്ന് ഉടലെടുത്ത വഴക്കിന് പിന്നാലെയായിരുന്നു പ്രകോപനം. സഹിലിനെ ബെല്‍റ്റ് ഉപയോഗിച്ച് ശ്വാസം മുട്ടിച്ച് കൊല്ലുകയായിരുന്നുവെന്ന് പ്രതികള്‍ കുറ്റ സമ്മതം നടത്തിയതായി ഡല്‍ഹി പൊലീസ് പറയുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ