കൊല്‍ക്കത്ത: ബംഗാള്‍ മുഖ്യമന്ത്രി മമത ബാനര്‍ജിയെ പരിഹസിച്ച് പ്രധാനമന്ത്രി നരേന്ദ്രമോദി. നന്ദിഗ്രാമിനെ കൂടാതെ മറ്റൊരു മണ്ഡലത്തില്‍ മത്സരിക്കാന്‍ നാമനിര്‍ദേശ പത്രിക സമര്‍പ്പിക്കുന്നുണ്ടോയെന്ന് മോദി ചോദിച്ചു. ആദ്യം നിങ്ങള്‍ നന്ദിഗ്രാമില്‍ പോയി. ജനം നിങ്ങള്‍ക്കതിനുള്ള മറുപടിയും നല്‍കി. നിങ്ങള്‍ ബംഗാളിലെ എവിടെപോയാലും ജനം നിങ്ങള്‍ക്ക് ശരിയായ മറുപടി നല്‍കുമെന്നും മോദി പറഞ്ഞു.
നന്ദിഗ്രാം മണ്ഡലത്തിലെ ബിജെപി സ്ഥാനാര്‍ഥിയില്‍ നിന്ന് മമത കടുത്ത വെല്ലുവിളിയാണ് നേരിടുന്നതെന്നും മോദി പറഞ്ഞു. തോല്‍ക്കുമെന്ന് ഉറപ്പായപ്പോള്‍ മമത നന്ദിഗ്രാമില്‍ തമ്പടിച്ചെന്നും മോദി പരഞ്ഞു. സ്വന്തം മണ്ഡലമായ ഭവാനീപൂര്‍ വിട്ട് നന്ദിഗ്രാമിലേക്ക് വന്നതിലെ അപകടം ഇപ്പോള്‍ മമതയ്ക്ക് മനസലിയെന്നും മോദി പറഞ്ഞു.
ബംഗാളിന്റെ സംസ്‌കാരത്തെ മമത അപമാനിച്ചെന്ന് മോദി പറഞ്ഞു. ബംഗ്ലാദേശിലെ മാ കാളി ക്ഷേത്രത്തില്‍ താന്‍ പ്രാര്‍ഥിക്കുന്നത് ദീദിയ്ക്ക് ഇഷ്ടമല്ല. മതവിശ്വാസമെന്നത് ഞങ്ങള്‍ക്ക് താത്കാലികമല്ലെന്നും വിശ്വാസത്തിലും പാരമ്പര്യത്തിലും ഞങ്ങള്‍ അഭിമാനിക്കുന്നുവെന്നും മോദി പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ