ന്യൂഡല്‍ഹി: ഐക്യമാണ് ഇന്ത്യയുടെ ശക്തിയെന്നും വെല്ലുവിളികളെ നേരിട്ട് രാജ്യം മുന്നേറുമെന്നും രാഷ്ട്രപതി രാംനാഥ് കോവിന്ദ്. പാര്‍ലമെന്റിന്റെ ബജറ്റ് സമ്മേളനത്തിന് മുന്നോടിയായി നടന്ന നയ പ്രഖ്യാപനത്തിലാണ് രാഷ്ട്രപതി ഇക്കാര്യം പറഞ്ഞത്.
അതേസമയം രാഷ്ട്രപതിയുടെ നയ പ്രഖ്യാപന പ്രസംഗം പ്രതിപക്ഷത്തെ 19 കക്ഷികള്‍ ബഹിഷ്‌കരിച്ചു. കോവിഡ് കാലത്ത് പാര്‍ലമെന്റ് സമ്മേളനം പരമ പ്രധാനമായ ഒന്നാണെന്ന് രാഷ്ട്രപതി ഓര്‍മപ്പെടുത്തി. അദ്ദേഹം സംസാരിക്കുന്നതിനിടെയും പ്രതിപക്ഷം ബഹളം വച്ചു.
കാര്‍ഷിക നയങ്ങളിലെ പരിഷ്‌കരണങ്ങളെ രാഷ്ട്രപതി നയ പ്രഖ്യാപനത്തില്‍ പരാമര്‍ശിച്ചു. കര്‍ഷകരുടെ ക്ഷേമത്തിനായാണ് പുതിയ നിയമം നടപ്പിലാക്കിയത്. കാര്‍ഷിക മേഖലയുടെ ആധുനികവത്കരണം ത്വരിതപ്പെടുത്തി. രാജ്യത്തെ ഭക്ഷ്യോത്പാദം റെക്കോര്‍ഡ് ഉയര്‍ത്തില്‍ എത്തി. കര്‍ഷകര്‍ക്ക് നിരവധി ആനുകൂല്യങ്ങള്‍ സര്‍ക്കാര്‍ നല്‍കി. സ്വാമിനാഥന്‍ റിപ്പോര്‍ട്ട് നടപ്പാക്കിയതും കൂടുതല്‍ താങ്ങുവില ഉറപ്പാക്കാനും സാധിച്ചുവെന്നും രാഷ്ട്രപതി വ്യക്തമാക്കി.
കോവിഡ് മഹാമാരിയുടെ കാലത്ത് ദരിദ്രര്‍ക്ക് ആശ്വാസമാകുന്ന ഒരുപാട് കാര്യങ്ങള്‍ സര്‍ക്കാര്‍ ചെയ്തു. സാമ്പത്തിക വെല്ലുവിളികള്‍ രാജ്യം മറികടന്നു. ആത്മനിര്‍ഭര്‍ ഭാരത് എന്ന പദ്ധതി ആരംഭിക്കാന്‍ സാധിച്ചത് അഭിമാനകരമായ കാര്യമാണെന്നും അദ്ദേഹം നയ പ്രഖ്യാപനത്തില്‍ പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ