ന്യൂഡല്‍ഹി: രണ്ട് യുവാക്കള്‍ തന്റെ പിന്നാലെ നടന്ന് ശല്യം ചെയ്യുകയും സോഷ്യല്‍മീഡിയയിലൂടെ അപമാനിക്കുകയും ചെയ്തതായി ബോളിവുഡ് നടിയുടെ പരാതി. പരാതിയുടെ അടിസ്ഥാനത്തില്‍ രണ്ടുപേര്‍ക്കെതിരെ ഡല്‍ഹിയിലെ വസന്ത് കുഞ്ച് നോര്‍ത്ത് പൊലീസ് കേസെടുത്ത് അന്വേഷണം ആരംഭിച്ചു. നടിയുടെ പേര് വെളിപ്പെടുത്തിയിട്ടില്ല.
യൂട്യൂബറും ട്വിറ്റര്‍ ഉപയോക്താവും ചേര്‍ന്നാണ് തന്നെ ശല്യം ചെയ്യുന്നത് എന്ന് ബോളിവുഡ് നടിയുടെ പരാതിയില്‍ പറയുന്നു. ഓണ്‍ലൈന്‍ പ്ലാറ്റ്‌ഫോമുകളില്‍ സ്ത്രീത്വത്തെ അപമാനിക്കുന്നവിധം സന്ദേശങ്ങള്‍ പ്രചരിപ്പിക്കുന്നു. താന്‍ അഭിനയിച്ച ചിത്രങ്ങളുമായി ബന്ധപ്പെട്ട ഹാഷ് ടാഗ് ദുരുപയോഗം ചെയ്യുന്നതായും നടിയുടെ പരാതിയില്‍ ചൂണ്ടിക്കാണിക്കുന്നു. നടിയുടെ പരാതിയില്‍ ക്രിമിനല്‍ കേസെടുത്താണ് പൊലീസ് അന്വേഷണം ആരംഭിച്ചത്.
സ്ത്രീത്വത്തെ അപമാനിക്കല്‍ ഉള്‍പ്പെടെ വിവിധ വകുപ്പുകള്‍ അനുസരിച്ച് ഇരുവര്‍ക്കുമെതിരെ കേസെടുത്തതായി പൊലീസ് പറയുന്നു. അശ്ലീല ഉള്ളടക്കം പ്രചരിപ്പിച്ചതിന് ഐടി ആക്ട് അനുസരിച്ചും നടപടി സ്വീകരിച്ചതായും അന്വേഷണം പുരോഗമിക്കുന്നതായും പൊലീസ് അറിയിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ