ന്യൂഡല്‍ഹി: രാജ്യത്തെ ഏറ്റവും വലിയ രണ്ടാമത്തെ ടെലികോം കമ്പനിയെന്ന പദവി ഇനി റിലയന്‍സ് ജിയോയ്ക്ക് സ്വന്തം. ഭാരതി എയര്‍ടെലിനെ മൂന്നാം സ്ഥാനത്തേയ്ക്ക് പിന്തളളിയാണ് റിലയന്‍സിന്റെ നേട്ടം.  ടെലികോം റെഗുലേറ്ററി അതോറിറ്റി ഒഫ് ഇന്ത്യയുടെ (ട്രായ്) മേയിലെ കണക്കുപ്രകാരം 32.3 കോടി ഉപഭോക്താക്കളാണ് ജിയോയ്ക്കുള്ളത്. 27.8 ശതമാനമാണ് വിപണിവിഹിതം.

ഭാരതി എയര്‍ടെല്‍ 32.03 കോടി വരിക്കാരുമായി മൂന്നാംസ്ഥാനത്തേക്ക് പിന്തള്ളപ്പെട്ടു. 27.6ശതമാനമാണ് വിപണിവിഹിതം. 38.75 കോടി വരിക്കാരുമായി വൊഡാഫോണ്‍-ഐഡിയ ഒന്നാംസ്ഥാനം നിലനിറുത്തി.

വൊഡാഫോണും ഐഡിയയും തമ്മില്‍ ലയിക്കുന്നതിന് മുമ്പ് 33 ശതമാനം വിപണി വിഹിതവുമായി ഇന്ത്യയിലെ ഏറ്റവും വലിയ ടെലികോം കമ്പനിയായിരുന്നു എയര്‍ടെല്‍. കഴിഞ്ഞവര്‍ഷം ജൂലായിലാണ് ഇരു കമ്പനികളും ലയിച്ചത്. മേയിലെ കണക്കനുസരിച്ച് 33.36 ശതമാനമാണ് വൊഡാഫോണ്‍ഐഡിയയുടെ വിപണിവിഹിതം. 

മേയില്‍ ജിയോ 81 ലക്ഷം വരിക്കാരെ പുതുതായി നേടി. അതേസമയം, വൊഡാഫോണ്‍ഐഡിയയ്ക്ക് 56 ലക്ഷം പേരെയും എയര്‍ടെല്ലിന് 15 ലക്ഷം പേരെയും നഷ്ടമായി. ബ്രോഡ്ബാന്‍ഡ് വിഭാഗത്തില്‍ 55.54 ശതമാനം വിപണി വിഹിതവുമായി ജിയോയാണ് മുന്നില്‍.

അതേസമയം ഏറ്റവുമധികം സജീവ വരിക്കാരുള്ളത് എയര്‍ടെല്ലിനാണ്. 99.86%. വൊഡാഫോണ്‍-ഐഡിയയ്ക്ക് ഇത് 86 ശതമാനവും ജിയോയ്ക്ക് 83 ശതമാനവുമാണ്.