ന്യൂഡല്‍ഹി: ഒരു ദിവസത്തെ ഇടവേളയ്ക്കു ശേഷം വീണ്ടും വില കൂടിയതോടെ രാജ്യ തലസ്ഥാനത്ത് ഡീസലിന് പെട്രോളിനേക്കാള്‍ ഒരു രൂപയോളം അധികം. ഇന്നത്തെ വില വര്‍ധനയോടെ 81.35 രൂപയാണ് ഡല്‍ഹിയിലെ ഡീസല്‍ വില. പെട്രോളിനാവട്ടെ 80.43 രൂപയും.

ഡീസല്‍ ലിറ്ററിന് 16 പൈസയാണ് ഇന്നു വര്‍ധിപ്പിച്ചത്. പെട്രോള്‍ വിലയില്‍ മാറ്റമില്ല. ലോക്ക്ഡൗണ്‍ കാലത്ത് പ്രതിദിനമുളള ഇന്ധനവില നിര്‍ണയം നിര്‍ത്തിവെച്ചിരിക്കുകയായിരുന്നു. പിന്നീട് വില നിര്‍ണയം ആരംഭിച്ചതോടെ, ഡീസല്‍ വിലയില്‍ മാത്രം 11 രൂപയുടെ വര്‍ധനയാണ് രേഖപ്പെടുത്തിയത്.

പെട്രോള്‍ വില ജൂണ്‍ 29ന് ശേഷം മാറ്റമില്ലാതെ തുടരുകയാണ്. രാജ്യത്തെ മറ്റു നഗരങ്ങളില്‍ ഡീസല്‍ വില വര്‍ധിച്ചിട്ടുണ്ടെങ്കിലും പെട്രോളിനെ അപേക്ഷിച്ച് ആറു രൂപയോളം കുറവാണ്.