ഗായത്രി എന്ന പെണ്‍കുട്ടിയിലൂടെ ഒരു ട്രാന്‍സ്‌ജെന്‍ഡറിന്റെ ഉള്ളില്‍ത്തട്ടുന്ന കഥ പറഞ്ഞിരിക്കുകയാണ് വിക്‌സ് കമ്പനി. യൂടുബില്‍ പോസ്റ്റ് ചെയ്തയുടന്‍ തന്നെ വീഡിയോ വൈറലായി. നാലു മണിക്കൂറിനുള്ളില്‍ 4.6 ലക്ഷത്തിലധികം പേരാണ് ഈ വീഡിയോ കണ്ടത്.
ചെറുപ്പത്തില്‍ അമ്മയെ നഷ്ടപ്പെട്ട ഗായത്രിക്ക് വളര്‍ത്തമ്മയായെത്തുന്ന ഗൗരി സാവേദ് എന്ന ട്രാന്‍സ് വുമണ്‍ 3 മിനിറ്റ് 47 സെക്കന്‍ഡ് ദൈര്‍ഘ്യമുള്ള വീഡിയോ കഴിയുമ്പോഴേക്കും കാണികളുടെ കണ്ണുകളെ നനയിക്കുന്നു. ഒരു നിമിഷം ഇരുത്തി ചിന്തിപ്പിക്കുന്നു.
വളരെ കുറച്ചു സമയം കൊണ്ട് അമ്മയും മകളും തമ്മിലുള്ള തീവ്രബന്ധത്തിന്റെ അനശ്വരമായ തലങ്ങള്‍ ഈ വീഡിയോയില്‍ കാണാനാകും. ഗൗരിയുടെ അമ്മ മരിക്കുകയും അപ്രതീക്ഷിതമായി ലഭിക്കുന്ന വളര്‍ത്തമ്മയുമായി അവിശ്വസിനീയമാം വിധത്തിലുള്ള ആത്മബന്ധം വളര്‍ന്നു വരികയും ചെയ്യുന്നു. വീഡിയോയുടെ അവസാന ഘട്ടത്തിലാണ് പെണ്‍കുട്ടിയുടെ അമ്മ ഒരു ട്രാന്‍സ്‌ജെന്‍ഡര്‍ സ്ത്രീയാണെന്ന് കാണികള്‍ക്ക് മനസിലാക്കാനാവു. അത് തന്നെയാണ് ഈ വീഡിയോയെ ജീവനുള്ളതാക്കുന്നത്.
ഇപ്പോഴും ഇന്ത്യയില്‍ പല സ്ഥലങ്ങളിലും എല്‍ജിബിടിക്യൂ വിഭാഗക്കാര്‍ വിമര്‍ശനത്തിനരയാകുന്നുണ്ട്. ശാരീരികവും മാനസികവുമായ പീഡനങ്ങള്‍ ഇത്തരക്കാര്‍ക്ക് ജീവിക്കാനുള്ള അവകാശം പോലും നിഷേധിക്കുന്നു. ഈ സാഹചര്യത്തില്‍ ഒരു ട്രാന്‍സ്‌ജെന്‍ഡര്‍ വനിതയുടെ മാതൃത്വമാണ് ഇവിടെ ചര്‍ച്ച ചെയ്യപ്പെടുന്നത്. ഇത്തരം വിഷയങ്ങളില്‍ സാധാരണ ജനങ്ങള്‍ക്കായുള്ള ബോധവല്‍ക്കരണം കൂടിയായി വിക്‌സിന്റെ പരസ്യത്തെ കണക്കാക്കാം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ