വെറും അഞ്ച് മിനിറ്റ് പോലും വേണ്ടി വന്നില്ല വര്‍ഷങ്ങള്‍ പഴക്കമുള്ള വമ്പന്‍ പാലം തകര്‍ന്നടിയാന്‍. അമേരിക്കയിലെ കാന്റോണിലുള്ള ബാര്‍ക്ക്‌ലി ബ്രിഡ്ജ് ആണ് അധികൃതര്‍ സ്‌ഫോടക വസ്തുക്കള്‍ ഉപയോഗിച്ച് തകര്‍ത്തത്. തടാകത്തിന് മുകളിലൂടെ പോകുന്ന ഈ പാലം പണി തീര്‍ത്തത് 1932ലാണ്. 3500 അടിയായിരുന്നു ഇതിന്റെ നീളം.

പാലത്തിന് സമാന്തരമായി മറ്റൊരു ബദല്‍ പാലം പണികഴിപ്പിച്ചതിനാലും ഇതിന്റെ കാലപ്പഴക്കം മൂലവുമാകാം തകര്‍ത്തു കളഞ്ഞത്. ഏതായാലും ഒരുപാട് കാലത്തെ പ്രയത്‌നം കൊണ്ട് മനുഷ്യന്‍ നിര്‍മ്മിക്കുന്ന വലിയ പ്രതിഭാസങ്ങളെല്ലാം അതിന്റെ ആയിത്തിലൊന്ന് സമയം കൊണ്ട് അവനു തന്നെ തകര്‍ത്ത് കളയാനാകും എന്നാണ് ഇതുപോലുള്ള വീഡിയോകളെല്ലാം സൂചിപ്പിക്കുന്നത്. 

566,000 ഡോളറായിരുന്നു ഈ പാലം തകര്‍ക്കാന്‍ വേണ്ടി വന്ന ചെലവ്. അതായത് 3.7 കോടി രൂപ. അത്യുഗ്ര ശേഷിയുള്ള സ്‌ഫോടക വസ്തുക്കള്‍ ഉപയോഗിച്ചായിരിക്കാം ഇത് ഞെടിയിടയില്‍ തകര്‍ത്തിട്ടുണ്ടാവുക. കാതടപ്പിക്കുന്ന ശബ്ദത്തോടു കൂടിയാണ് ഇത് തകര്‍ന്നു വീണത്. തകര്‍ന്ന ഉടനെത്തന്നെ വന്‍ തോതില്‍ പൊടിപടലങ്ങള്‍ ഉയരുകയും ചെയ്തു. ഒരുപാട് സമയമെടുത്താണ് പിന്നീട് ആ പ്രദേശത്തെ കാലാവസ്ഥ പൂര്‍വ്വസ്ഥിതിയിലായത്. 24 മണിക്കൂര്‍ സമയത്തേക്ക് അതുവഴിയുള്ള ജലഗതാഗതവും പാലം വഴിയുള്ള ഗതാഗതവും അധികൃതര്‍ നിര്‍ത്തിവെച്ചിരുന്നു.

കെവൈടിസിഡി ഡിസ്ട്രിക്റ്റ്1 എന്ന ഫേസ്ബുക്ക് പേജില്‍ പ്രസിദ്ധീകരിച്ച വീഡിയോയിലൂടെയാണ് പാലം തകര്‍ത്ത വാര്‍ത്ത പുറംലോകമറിയുന്നത്. 11 മിനിറ്റ് ദൈര്‍ഘ്യമുള്ള വീഡിയോ ചുരുങ്ങിയ സമയം കൊണ്ട് ആയിരക്കണക്കിന് ആളുകളാണ് കണ്ടു കഴിഞ്ഞത്.