പിൻകാലിൽ ഉയർന്നുനിന്നും സൈക്കിൾ ചവിട്ടിയുമൊക്കെയുള്ള ആനയുടെ അഭ്യാസപ്രകടനം സാധാരണ സർക്കസ് കൂടാരങ്ങളിലാണ് കാണുന്നത്. എന്നാൽ രണ്ടുകാലിൽ ഉയർന്നു നിൽക്കുന്ന ഒരു കാട്ടാനയുടെ ചിത്രങ്ങളാണ് സോഷ്യൽ ലോകത്ത് പ്രിയം നേടുന്നത്. സിംബാ‌ബ്‌വേയിലെ മനാപൂൾ ദേശീയ പാർക്കിൽ നിന്ന് ഫൊട്ടോഗ്രഫറായ ബോബി ജോ വിയാൽ പകർത്തിയ ചിത്രങ്ങളാണ് ഇവ.

തന്റെ ഫൊട്ടോഗ്രഫി ജീവിതത്തിലെ അപൂർവ ചിത്രങ്ങളാണിതെന്ന‌് കുറിച്ചുകൊണ്ട് ബോബി തന്നെയാണ് ചിത്രങ്ങൾ പങ്കുവച്ചിരിക്കുന്നത്. വലിയ മരത്തിൽ നിറഞ്ഞുനിന്നിരുന്ന പച്ചിലകൾ എത്തിപ്പിടിക്കാൻ ശ്രമിക്കുന്നതിനിടെയാണ് ആന പിൻകാലിൽ ഉയർന്നു നിന്നത്. പിൻ കാലിൽ ബലം കൊടുത്ത് മുൻകാലുകൾ ഉയർത്തി നിന്ന് തുമ്പിക്കൈകൊണ്ട് മരത്തിന്റെ ശിഖരം ഒടിച്ച് ഇലകൾ ഭക്ഷിക്കുകയാണ് ഈ കാട്ടാന.

ആനയുടെ ഇത്തരത്തിലൊരു ചിത്രം പകർത്താൻ താൻ വർഷങ്ങളായി കാത്തിരിക്കുകയായിരുന്നെന്നും ബോബി പറഞ്ഞു. ഇതിനുമുമ്പും മനാപൂളിൽ നിന്ന് ഇത്തരത്തിലുള്ള ചിത്രം വൈറലായിട്ടുണ്ട്.‌