റാഞ്ചി : സ്‌കൂള്‍ പഠനകാലത്ത് പഠിച്ച സിദ്ധാന്തങ്ങളൊന്നും നിത്യജീവിതത്തില്‍ പലപ്പോഴും പ്രയോഗിക്കേണ്ടി വരാറില്ല. എന്നാല്‍ കിണറ്റില്‍ അകപ്പെട്ട കാട്ടാനയെ രക്ഷിക്കാന്‍ ആര്‍ക്കമിഡീസ് തത്വം പ്രയോഗിക്കുകയായിരുന്നു വനംവകുപ്പ് ഉദ്യോഗസ്ഥര്‍. ജാര്‍ഖണ്ഡിലെ ഗുല്‍മ ജില്ലയിലുള്ള ആമ്‌ലിയ ടോലി ഗ്രാമത്തിലാണ് സംഭവം നടന്നത്.
കാട്ടാന കിണറിനുള്ളില്‍ വീണത് ചൊവ്വാഴ്ച പുലര്‍ച്ചെയാണ് നാട്ടുകാര്‍ കണ്ടത്. അപ്പോള്‍ തന്നെ നാട്ടുകാര്‍ വനം വകുപ്പ് ഉദ്യോഗസ്ഥരെ വിവരമറിയിച്ചു. ഉടന്‍തന്നെ ഉദ്യോഗസ്ഥര്‍ സംഭവ സ്ഥലത്തെത്തി. ആനയെ പുറത്തെത്തിക്കാന്‍ ആര്‍ക്കമിഡീസ് തത്വം പ്രയോഗിക്കാന്‍ ഉദ്യോഗസ്ഥര്‍ തീരുമാനിക്കുകയായിരുന്നു.
മൂന്ന് പമ്പുകളുപയോഗിച്ച് കിണറിനുള്ളിലേക്ക് വെള്ളം ശക്തിയായി പമ്പ് ചെയ്താണ് ആനയെ പുറത്തെത്തിച്ചത്.കിണറിനുള്ളില്‍ വെള്ളം നിറഞ്ഞപ്പോള്‍ പൊങ്ങിവന്ന ആനയെ പുറത്തെത്തിക്കുകയായിരുന്നു. രാവിലെ ഏഴുമണിക്ക് തുടങ്ങിയ രക്ഷാപ്രവര്‍ത്തനം മൂന്നുമണിക്കൂര്‍ നീണ്ടു. ഐഎഫ്എസ് ഉദ്യോഗസ്ഥനായ രമേഷ് പാണ്ടെയാണ് ഈ ദൃശ്യങ്ങള്‍ ട്വിറ്ററിലൂടെ പുറത്തുവിട്ടത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ