2017 ഇന്ത്യന്‍ നായകന്‍ വിരാട്  കോഹ് ലിയുടെ സ്വപ്‌ന വര്‍ഷം തന്നെയാണ്. ടീമിനെ തുടര്‍ച്ചയായി വിജയങ്ങളിലേക്കെത്തിക്കുന്ന നായകന്‍ എന്നതിന് പുറമേ കളിക്കളത്തില്‍ വ്യക്തിപരമായ നേട്ടങ്ങള്‍ കൊയ്യുന്നതിലും കോഹ് ലി മുന്നേറ്റം നടത്തിയ വര്‍ഷമാണ് കടന്നു പോകുന്നത്. 

മുന്നിലുള്ള റെക്കോര്‍ഡുകളെല്ലാം മറികടന്നാണ് കോഹ്  ലിയുടെ  പോക്ക്. അതിനിടയില്‍, ഒരു കലണ്ടര്‍ വര്‍ഷം 2868 രണ്‍സ് എന്ന കുമാര്‍ സംഗക്കാരയുടെ റെക്കോര്‍ഡ് തകര്‍ക്കാന്‍ കോഹ് ലിക്ക് ഈ വര്‍ഷം സാധിച്ചില്ലെന്നായിരുന്നു മാധ്യമ പ്രവര്‍ത്തകനായ അസം അമീന്‍ ചൂണ്ടിക്കാട്ടിയത്. 

2017ല്‍ കോഹ് ലിയുടെ 2818ല്‍ അവസാനിച്ചതോടെയായിരുന്നു ട്വിറ്ററിലൂടെയുള്ള അസമിന്റെ പ്രതികരണം. എന്നാല്‍ പിന്നാലെ മറുപടിയുമായി സംഗക്കാരയെത്തി. കോഹ് ലി ബാറ്റിങ് അവസാനിപ്പിക്കാത്തിടത്തോളം 2014ല്‍ ഞാന്‍ തീര്‍ത്ത ആ റെക്കോര്‍ഡിന് അധികം  ആയുസുണ്ടാകില്ലെന്നായിരുന്നു സംഗക്കാരയുടെ മറുപടി. 

അടുത്ത വര്‍ഷം കോഹ് ലി അത് മറികടന്നേക്കാം. അതിന് അടുത്ത വര്‍ഷവും കോഹ് ലി അത് തന്നെ ആവര്‍ത്തിക്കും, അതൊരു പ്രത്യേക ഇനമാണെന്നായിരുന്നു സംഗക്കാരയുടെ പ്രതികരണം.