ലോകം മുഴുവന്‍ ആരാധകരെ നേടിക്കഴിഞ്ഞു ഇന്ത്യന്‍ നായകന്‍ വിരാട് കോഹ് ലി. പക്ഷെ ഇങ്ങനെയൊരു വിവാഹ അഭ്യര്‍ഥന ഇന്ത്യന്‍ നായകനെ തേടിയെത്തുമെന്ന് ആരും പ്രതീക്ഷിച്ചു കാണില്ല. 

പാക്കിസ്ഥാന്റെ വേള്‍ഡ് ഇലവനെതിരായ മത്സരം നടക്കുന്നതിന് ഇടയിലായിരുന്നു കോഹ് ലിക്ക് വ്യത്യസ്തമായൊരു വിവാഹാഭ്യര്‍ഥന എത്തിയത്. അതും ഒരു പൊലീസുകാരനില്‍ നിന്നും. KOHLI MARRY ME എന്നെഴുതിയ ബാനറുമായി നില്‍ക്കുന്ന പാക്കിസ്ഥാനി പൊലീസുകാരന്റെ ബാനര്‍ ഇപ്പോള്‍ തന്നെ സമൂഹമാധ്യമങ്ങള്‍ ഏറ്റെടുത്തു കഴിഞ്ഞു. 

ഇംഗ്ലീഷ് വനിതാ ക്രിക്കറ്റ് താരം ഡാനിയേലി വ്യാട്ട് വരെയുണ്ട് കോഹ് ലിക്ക് മുന്നില്‍ വിവാഹാഭ്യാര്‍ഥനയുമായി എത്തിയവരുടെ പട്ടികയില്‍. എന്നാലിത് കോഹ് ലി സ്വപ്‌നത്തില്‍ പോലും പ്രതീക്ഷിച്ചിരിക്കില്ല. 

വേള്‍ഡ് ഇലവനില്‍ കോഹ് ലി, ധോനി ഉള്‍പ്പെടെയുള്ള ഇന്ത്യന്‍ താരങ്ങള്‍ ഇല്ലാതെ പോയതിന്റെ നിരാശ പാക്കിസ്ഥാനി ആരാധകര്‍ സമൂഹമാധ്യമങ്ങളിലൂടെ പ്രകടിപ്പിച്ചിരുന്നു. രാജ്യങ്ങള്‍ തമ്മില്‍ ശത്രുതയില്‍ നില്‍ക്കുകയാണെങ്കിലും കോഹ് ലിയേയും, ധോനിയേയും തങ്ങള്‍ക്ക് എത്രമാത്രം ഇഷ്ടമാണെന്ന മറച്ചുവയ്ക്കാതെ പറയാനും പാക്കിസ്ഥാനി ആരാധകര്‍ മടിച്ചിരുന്നില്ല.