ബംഗളൂരു: സൺറൈസേഴ്സ് ഹൈദരാബാദിനെതിരായ പോരാട്ടത്തിൽ നായകൻ ധോണിയുടെ അഭാവത്തിലാണ് ചെന്നൈ സൂപ്പർ കിങ്സ് കളിക്കാനിറങ്ങിയത്. പരുക്കിനെ തുടർന്നായിരുന്നു ധോണി മാറി നിന്നത്. സുരേഷ് റെയ്നയാണ് ടീമിനെ നയിച്ചത്. എന്നാൽ ധോണിയുടെ അഭാവത്തിൽ ടീമിന് തോൽവിയായിരുന്നു ഫലം. 

ചെന്നൈ ആരാധകർക്ക് ആശ്വസമാകുന്ന വാർത്തകളാണ് ഇപ്പോൾ പുറത്തുവരുന്നത്. ഇന്ന് റോയൽ ചലഞ്ചേഴ്സ് ബാംഗ്ലൂരിനെതിരെ നടക്കുന്ന മത്സരത്തിൽ ധോണി കളിക്കുമെന്ന സൂചനകളാണ് പുറത്തുവരുന്നത്.‌ ധോണി നെറ്റ്സിൽ പരിശീലനം നടത്തുന്നതിന്റെ വീഡിയോ ടീം പുറത്തുവിട്ടു. ഇന്നലെ രാത്രി ബംഗളൂരു ചിന്നസ്വാമി സ്റ്റേഡിയത്തിൽ ധോണി‌ പരിശീലനം നടത്തുന്നതിന്റെ വീഡിയോയാണ് ചെന്നൈ തങ്ങളുടെ ട്വിറ്റർ അക്കൗണ്ടിലൂടെ പങ്ക് വെച്ചത്. ബൗളർമാരെ സ്റ്റെപ്പൗട്ട് കയറി പ്രഹരിക്കുന്ന ധോണി പരുക്കിന്റെ പിടിയിൽ നിന്ന് മോചിതനായെന്നാണ് അദ്ദേഹത്തിന്റെ ബാറ്റിങ് പ്രകടനം സൂചിപ്പിക്കുന്നത്.

നേരത്തെ പുറത്തിനേറ്റ പരുക്കിനെ തുടർന്നായിരുന്നു ഹൈദരാബാദിനെതിരായ മത്സരത്തിൽ നിന്ന് ധോണി വിട്ടുനിന്നത്. ഇന്ന് ബാംഗ്ലൂരിനെതിരായ മത്സരത്തിൽ ധോണി തിരിച്ചെത്തുന്നതോടെ ചെന്നൈ വിജയ വഴിയിൽ തിരിച്ചെത്തുമെന്നാണ് ആരാധക പ്രതീക്ഷ. സീസണിൽ രണ്ട് തോൽവികളാണ് ചെന്നൈക്ക് നേരിടേണ്ടി വന്നത്.