ലണ്ടന്‍: ഇംഗ്ലണ്ട് മുന്‍ ക്രിക്കറ്റ് ടീം നായകനും ഇതിഹാസ പേസറുമായ ബോബ് വില്ലിസ്(70)അന്തരിച്ചു. ഇംഗ്ലീഷ് പേസ് നിരയുടെ മുഖമായിരുന്ന വില്ലിസ് 1982-84 കാലയളവിലാണ് ഇംഗ്ലണ്ടിനെ നയിച്ചത്. എതിരാളികളെ വിറപ്പിക്കുന്ന പേസുമായി 90 ടെസ്റ്റ് മത്സരങ്ങള്‍ അദ്ദേഹം ഇംഗ്ലണ്ട് കുപ്പായമണിഞ്ഞു. 

1981ലെ ആഷസില്‍ ഹെഡിങ്‌ലേയില്‍ 43 റണ്‍സ് മാത്രം വഴങ്ങി എട്ട് ഓസീസ് വിക്കറ്റുകളാണ് ബോബ് പിഴുതത്. ബോബിന്റെ കരിയറിലെ ഏറ്റവും മികച്ച പ്രകടനമായി ക്രിക്കറ്റ് ലോകം വാഴ്ത്തുന്നത് ഈ പ്രകടനമാണ്. 325 വിക്കറ്റുകള്‍ പിഴുതാണ് വില്ലീസ് ടെസ്റ്റ് കരിയര്‍ അവസാനിപ്പിച്ചത്. വിക്കറ്റ് വേട്ടയില്‍ ജെയിംസ് ആന്‍ഡേഴ്‌സനും, സ്റ്റുവര്‍ട്ട് ബ്രോഡിനും ബോതമിനും പിന്നില്‍ നാലാമതാണ് വില്ലിസ്. 

1984ല്‍ വിരമിക്കുമ്പോഴേക്കും 18 ടെസ്റ്റുകളിലും 29 ഏകദിനങ്ങളിലും വില്ലിസ് ഇംഗ്ലണ്ടിനെ നയിച്ചു. 1982ല്‍ കെയ്ത് ഫ്‌ലച്ചറിനെ നായക സ്ഥാനത്ത് നിന്നും പുറത്താക്കിയാണ് ഇംഗ്ലണ്ട് ടീമിനെ വില്ലിസിന്റെ കൈകളിലേക്ക് നല്‍കിയത്. 18 ടെസ്റ്റില്‍ നിന്ന് ഏഴ് ജയവും, 5 തോല്‍വിയും ആറ് സമനിലയുമാണ് വില്ലിസ് നയിച്ച ടെസ്റ്റുകളില്‍ ഇംഗ്ലണ്ടിന് ലഭിച്ചത്.