നാഗ്പുര്‍: ക്രിക്കറ്റ് ഗ്രൗണ്ടില്‍ നിന്ന് മറ്റൊരു അപകടവാര്‍ത്ത കൂടി. ബംഗാള്‍ പേസര്‍ അശോക് ഡിന്‍ഡയ്ക്ക് പരുക്കേറ്റതിന് പിന്നാലെ ഇറാനി ട്രോഫിയില്‍ റെസ്റ്റ് ഓഫ് ഇന്ത്യയും വിദര്‍ഭയും തമ്മിലുള്ള മത്സരത്തിനിടെ അമ്പയര്‍ നന്ദനാണ് പരിക്കേറ്റത്. ഫീല്‍ഡറുടെ ത്രോ അമ്പയറുടെ തലയില്‍ വന്നിടിക്കുകയായിരുന്നു.
മത്സരത്തിന്റെ 95ാം ഓവറിലാണ് സംഭവം. ലോങ് ഓഫിലേക്ക് ഷോട്ട് അടിച്ച ഹനുമ വിഹാരി സിംഗിളെടുത്തു. ഇതിനിടയില്‍ വിദര്‍ഭ ഫീല്‍ഡര്‍ പന്ത് ബൗളിങ് എന്‍ഡിലേക്ക് എറിഞ്ഞുകൊടുക്കുകയായിരുന്നു. ഈ സമയം ശ്രദ്ധിക്കാതെ തിരിഞ്ഞുനടന്ന അമ്പയറുടെ തലയില്‍ പന്ത് വന്ന് കൊള്ളുകയായിരുന്നു.
വേദന സഹിക്കാനാവാതെ അമ്പയര്‍ തല പൊത്തിപ്പിടിച്ച് നിലത്തിരുന്നു. വൈദ്യ സംഘം ഗ്രൗണ്ടില്‍ എത്തി അമ്പയറെ പരിശോധിച്ചു. ലെഗ് അമ്പയറായ നിതിന്‍ മേനോന്‍, നന്ദനോട് വിശ്രമിക്കാന്‍ ആവശ്യപ്പെട്ടെങ്കിലും അദ്ദേഹം അമ്പയറിങ് തുടര്‍ന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ