മുംബൈ: ഇന്ത്യന്‍ ക്രിക്കറ്റ് ടീമിന്റെ 15 അംഗ സംഘത്തില്‍ ഉള്‍പ്പെട്ടാലും ധോനിയെ പ്ലേയിങ് ഇലവനിലേക്ക് പരിഗണിക്കില്ലെന്ന് റിപ്പോര്ട്ട്. വിന്‍ഡിസ് പര്യടനത്തിലുള്ള ഇന്ത്യന്‍ ക്രിക്കറ്റ് ടീമില്‍ ധോനിയുണ്ടാവില്ല. ഇന്ത്യയ്ക്ക് അകത്തും പുറത്തുമുള്ള പര്യടനങ്ങളില്‍ ധോനി ഇനി ഫസ്റ്റ് ചോയിസ് വിക്കറ്റ് കീപ്പര്‍ ആയിരിക്കില്ലെന്നാണ് ടൈംസ് ഓഫ് ഇന്ത്യ റിപ്പോര്ട്ട് ചെയ്യുന്നത്.
റിഷഭ് പന്തിനെയാണ് ധോനിക്ക് പകരം വിക്കറ്റ് കീപ്പറായി പരിഗണിക്കുക. എന്നാല്‍, ഉത്തരവാദിത്വം ഏറ്റെടുക്കാന്‍ പന്ത് പൂര്‍ണമായും പ്രാപ്തമാവുന്നത് വരെ പന്തിനെ ധോനിയുടെ നിരീക്ഷണത്തില്‍ പരിശീലിപ്പിക്കും. ഇന്ത്യന്‍ ടീമിന്റെ പതിനഞ്ചംഗ സംഘത്തില്‍ ധോനിയെ ഉള്‍പ്പെടുത്തും. എന്നാല്‍ പ്ലേയിങ് ഇലവനിലേക്ക് തെരഞ്ഞെടുക്കില്ല. മാര്‍ഗനിര്‍ദേശം നല്‍കാന്‍ ടീമിന് പ്രാപ്തമായൊരാള്‍ വേണം. ധോനി ടീമില്‍ നിന്ന് മാറി നില്‍ക്കുന്നത് പ്രതികൂല ഫലം നല്‍കും എന്നുമാണ് മാനേജ്‌മെന്റ് വിലയിരുത്തല്‍ എന്നാണ് ടൈംസ് ഓഫ് ഇന്ത്യയുടെ റിപ്പോര്ട്ട് ചെയ്യുന്നത്.
ഇന്ത്യന്‍ ക്രിക്കറ്റിന്റെ പരിവര്‍ത്തന ഘട്ടത്തില്‍ ധോനി ടീമിനൊപ്പം ഉണ്ടാവുമെന്നാണ് റിപ്പോര്ട്ട്. എന്നാല്‍, ധോനിയുടെ വിരമിക്കലുമായി ബന്ധപ്പെട്ട് ഔദ്യോഗിക വിശദീകരണം ബിസിസിഐയുടെ ഭാഗത്ത് നിന്നുമുണ്ടായിട്ടില്ല. വിന്‍ഡിസ് പര്യടനത്തിനുള്ള ഇന്ത്യന്‍ ടീമിനെ പ്രഖ്യാപിക്കുമ്പോള്‍ ധോനിയുടെ കാര്യത്തില്‍ സെലക്ടര്‍മാര്‍ വ്യക്തത വരുത്തുമെന്നാണ് പ്രതീക്ഷിക്കപ്പെടുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ