ന്യൂഡൽഹി: ഇന്ത്യൻ പ്രീമിയർ ലീ​ഗിലെ താര ലേലവുമായി ബന്ധപ്പെട്ട് ഡൽഹി ഹൈക്കോടതിയിൽ പൊതുതാത്പര്യ ഹർജി നൽകിയ യുവാവിന് കിട്ടിയത് എട്ടിന്റെ പണി. ഹർജിയിൽ കഴമ്പില്ലെന്ന് ചൂണ്ടിക്കാട്ടി ഇത് തള്ളിയ കോടതി യുവാവിന് 25,000 രൂപയുടെ പിഴയും ചുമത്തി.  

ഐപിഎൽ ലേലം പോലുള്ള പരിപാടികൾ അഴിമതിയേയും, സ്വജനപക്ഷപാതത്തേയും, മനുഷ്യക്കടത്തിനേയും പ്രോത്സാഹിപ്പിക്കുന്നതാണെന്ന് യുവാവ് ഹർജിയിൽ ആരോപിച്ചു. ലേലം തെറ്റായ സന്ദേശമാണ് ജനങ്ങൾക്ക് നൽകുന്നതെന്നും ഇത് ഇന്ത്യൻ നിയമങ്ങളുടെ തുറന്ന ചട്ട ലംഘനമാണെന്നും ഹർജിയിൽ പറയുന്നു. 

പരാതി പരിശോധിച്ച ഹൈക്കോടതി നിരുപാധികം ഈ ആരോപണങ്ങളും ഹർജിയും തള്ളിക്കളയുകയായിരുന്നു. യുവാവിന്റെ ഹർജി അപ്രധാനമായ ഒന്നാണെന്നും യാതൊരു കഴമ്പും അതിലില്ലെന്നും ചൂണ്ടിക്കാട്ടിയ കോടതി അദ്ദേഹത്തിന് 25000 രൂപ പിഴയും ചുമത്തി‌. കുറച്ച് ദിവസങ്ങൾക്ക് മുൻപാണ് ഇത്തരമൊരു സംഭവം ‌ഡൽഹിയിൽ അരങ്ങേറിയത്. 

ചീഫ് ജസ്റ്റിസ് ഡി എൻ പട്ടേലും, ജസ്റ്റിസ് സി ഹരിശങ്കറും അടങ്ങിയ ബെഞ്ചാണ് സുധീർ ശർമ്മ എന്ന പേരുള്ള യുവാവിന്റെ പൊതുതാത്പര്യ ഹർജി തള്ളിയത്‌. ഇത് പൊതുതാത്പര്യ ഹർജിയായി കണക്കിലെടുക്കാൻ കഴിയില്ലെന്നും, പൊതു ജനങ്ങൾക്ക് മുന്നിൽ പ്രശസ്തി ലഭിക്കാൻ വേണ്ടി നൽകിയ ഹർജിയാണെന്നും ഹൈക്കോടതി ചൂണ്ടിക്കാട്ടി.