2-0ന് പിന്നില്‍ നിന്നതിന് ശേഷം തകര്‍പ്പന്‍ തിരിച്ചു വരവാണ് ഓസ്‌ട്രേലിയ നടത്തിയത്. ലോക കപ്പിന് മുന്‍പ് ഇന്ത്യയ്‌ക്കെതിരെ പരമ്പര പിടിച്ച് ഓസ്‌ട്രേലിയ ആത്മവിശ്വാസം കൂട്ടുന്നു. അതിനിടയിലാണ് അഞ്ചാം ഏകദിനത്തില്‍ ഓസ്‌ട്രേലിയയ്ക്ക് വേണ്ടി പുതിയ താരങ്ങള്‍ അരങ്ങേറ്റം കുറിച്ചുവെന്ന ട്വീറ്റുമായി ക്രിക്കറ്റ് ഓസ്‌ട്രേലിയ വരുന്നത്. 

ഫിറോസ് ഷാ കോട്‌ലയിലെ സ്‌കോര്‍ ബോര്‍ഡ് തന്നെ വിഷയം. സ്‌കോര്‍ ബോര്‍ഡില്‍ ഓസീസ് താരങ്ങളുടെ സ്‌പെല്ലിങ് തെറ്റായി എഴുതിയതാണ് കാര്യം. കമിന്‍സിന്റെ പേര് സ്‌പെല്ലിങ് തെറ്റിച്ച് കോമിന്‍സ്(commins) എന്നും, മാക്‌സ്വെല്ലിന്റെ പേര് mexwell എന്നുമാണ് മാന്യുവല്‍ സ്‌കോര്‍ ബോര്‍ഡില്‍ കാണിച്ചത്. 

അതുകൊണ്ടും തീര്‍ന്നില്ല, പ്ലേയിങ് ഇലവനില്‍ ഇല്ലാത്ത ഷോര്‍ട്ടിന്റേയും ആന്‍ഡ്ര്യു ടൈ, ബെഹ്‌റന്‍ഡോര്‍ഫ് എന്നിവരുടെ പേരുകള്‍ ഓസീസ് സ്‌കോര്‍ ബോര്‍ഡില്‍ ഇടം പിടിക്കുകയും ചെയ്തു. ട്വിറ്ററിലൂടെ ക്രിക്കറ്റ് ഓസ്‌ട്രേലിയ തന്നെയാണ് ഈ പിശക് ആരാധകരുടെ മുന്നിലേക്ക് കൊണ്ടുവന്നത്. 

ഓസ്‌ട്രേലിയയ്ക്ക് വേണ്ടി ഏതാനും പുതിയ താരങ്ങള്‍ അരങ്ങേറ്റം കുറിച്ചെന്ന് തോന്നുന്നു എന്നായിരുന്നു ക്രിക്കറ്റ് ഓസ്‌ട്രേലിയയുടെ ട്വീറ്റ്. പരമ്പരജയം നിര്‍ണയിക്കുന്ന ഏകദിനത്തില്‍ 35 റണ്‍സിന് ഇന്ത്യയെ കീഴടക്കിയാണ് ഓസ്‌ട്രേലിയ പരമ്പര സ്വന്തമാക്കിയത്.