ഇന്‍ഡോര്‍ ടെസ്റ്റില്‍ ഇന്ത്യ പിടിമുറുക്കുന്നു. ആദ്യ ദിനത്തിലെ രണ്ടാം സെഷന്‍ പിന്നിട്ട് ചായയ്ക്ക് പിരിയുമ്പോഴേക്കും ബംഗ്ലാേേദശിന്റെ ഏഴ് വിക്കറ്റുകള്‍ വീണു. 54 ഓവറില്‍ 140 റണ്‍സ് എന്ന നിലയിലാണ് ബംഗ്ലാദേശ് വീണത്. 

ഇഷാന്ത് ശര്‍മയും, ഉമേഷ് യാദവും ചേര്‍ന്ന തുടങ്ങിയ വിക്കറ്റ് വേട്ട മുഹമ്മദ് ഷമിയും, ആര്‍ അശ്വിനും ചേര്‍ന്ന് ഏറ്റെടുത്തു. 11 ഓവറില്‍ 27 റണ്‍സ് മാത്രം വഴങ്ങി മൂന്ന് വിക്കറ്റ് വീഴ്ത്തിയ മുഹമ്മദ് ഷമിയാണ് കൂടുതല്‍ ആക്രമിച്ചത്. അശ്വിന്‍ 16 ഓവറില്‍ 43 റണ്‍സ് വഴങ്ങി 2 വിക്കറ്റ് വീഴ്ത്തി. 

105 പന്തില്‍ 43 റണ്‍സ് എടുത്ത മുഷ്ഫിഖര്‍ റഹീമാണ് ബംഗ്ലാദേശ് നിരയില്‍ അല്‍പ്പമെങ്കിലും ചെറുത്ത് നിന്നത്. മൊമിനല്‍ ഹഖ് 80 പന്തില്‍ 37 റണ്‍സ് നേടി. മൂന്ന് വിക്കറ്റ് നഷ്ടത്തില്‍ 31 റണ്‍സ് എന്ന നിലയില്‍ നിന്ന് മുഷ്ഫിഖറിന്റേയും ഹഖിന്റേയും ചെറുത്ത് നില്‍പ്പ് ബംഗ്ലാദേശിന് ആശ്വാസം നല്‍കി. എന്നാല്‍ ബംഗ്ലാദേശ് സ്‌കോര്‍ 99ല്‍ നില്‍ക്കെ ഹഖിനെ ബൗള്‍ഡ് ചെയ്ത് അശ്വിന്റെ സ്‌ട്രൈക്ക്...

ബംഗ്ലാദേശ് സ്‌കോര്‍ 140ല്‍ നില്‍ക്ക് മുഷ്ഫിഖര്‍ റഹീമിന്റെ കുറ്റി ഷമി തെറിപ്പിച്ചു. തൊട്ടടുത്ത പന്തില്‍ തന്നെ മെഹ്ദി ഹസനേയും മടക്കി ഇന്ത്യന്‍ ആധിപത്യം ഷമി ഊട്ടിയുറപ്പിച്ചു. നേരത്തെ, ടോസ് നേടിയ ബംഗ്ലാദേശ് ബാറ്റിങ് തെരഞ്ഞെടുക്കുകയായിരുന്നു. എന്നാല്‍ ഓപ്പണര്‍മാരെ ആദ്യ ഓവറുകളില്‍ തന്നെ മടക്കി ഇഷാന്തും, ഉമേഷ് യാദവും കളി ഇന്ത്യയുടെ വരുതിയിലാക്കിയിരുന്നു.