ടി10 ലീഗില്‍ പോരിനിറങ്ങുകയാണ് ഇന്ത്യന്‍ മുന്‍ താരം യുവരാജ് സിങ് ഇപ്പോള്‍. പക്ഷേ അതിനിടയില്‍ തന്റെ ഇന്‍സ്റ്റഗ്രാം പോസ്റ്റിന് യുവിയിട്ട ക്യാപ്ഷനിലേക്കാണ് ഇപ്പോള്‍ ആരാധകരുടെ ശ്രദ്ധയെത്തുന്നത്. 

ഫോം താത്കാലികമാണ്. ക്ലാസ് എല്ലാക്കാലത്തേക്കും എന്നാണ് അബുദാബി ടി10ന് ഇടയിലെ ഗ്രൗണ്ടില്‍ നില്‍ക്കുന്ന തന്റെ ഫോട്ടോ പങ്കുവെച്ച് യുവി എഴുതിയത്. ഇന്ത്യന്‍ ടീമില്‍ നിന്ന് ഒഴിവാക്കിയതില്‍ ഉള്‍പ്പെടെ കുത്തിയാണ് യുവിയുടെ വാക്കുകള്‍ എന്നാണ് ആരാധകര്‍ വായിച്ചെടുക്കുന്നത്. 

യുവിയുടെ പോസ്റ്റിന് കമന്റുമായി ഹര്‍ഭജന്‍ ഉള്‍പ്പെടെയുള്ളവരും എത്തിയിട്ടുണ്ട്. അബുദാബി ടി10ല്‍ ബംഗ്ലാ ടൈഗേഴ്‌സിനെ യുവിയുടെ മറാത്ത അറേബ്യന്‍സ് ഏഴ് വിക്കറ്റിന് തോല്‍പ്പിച്ചു. 107 റണ്‍സ് പിന്തുടര്‍ന്ന അറേബ്യന്‍സ് മൂന്ന് വിക്കറ്റ് നഷ്ടത്തില്‍ 48 റണ്‍സ് എന്ന നിലയില്‍ പരുങ്ങിയെങ്കിലും 23 റണ്‍സ് നേടിയ യുവിയും, 36 റസ് നേടിയ നജിബുള്ളയും ടീമിനെ ജയത്തിലേക്ക് എത്തിച്ചു.