പൂനെ: ദക്ഷിണാഫ്രിക്കയ്‌ക്കെതിരായ രണ്ടാം ക്രിക്കറ്റ് ടെസ്റ്റില്‍ ഇന്ത്യ പൊരുതുന്നു. ടോസ് നേടി ബാറ്റിങിനിറങ്ങിയ ഇന്ത്യ ഉച്ച ഭക്ഷണത്തിന് പിരിയുമ്പോള്‍ ഒരു വിക്കറ്റ് നഷ്ടത്തില്‍ 77 റണ്‍സെന്ന നിലയിലാണ്. ഓപണര്‍ രോഹിത് ശര്‍മയുടെ വിക്കറ്റാണ് ഇന്ത്യക്ക് നഷ്ടമായി. റബാഡയ്ക്കാണ് വിക്കറ്റ്. 

ഓപണര്‍ മായങ്ക് അഗര്‍വാള്‍ (34), ചേതേശ്വര്‍ പൂജാര (19) എന്നിവരാണ് ക്രീസില്‍. 80 പന്തുകള്‍ നേരിട്ട് ഏഴ് ഫോറുകളുമായാണ് മായങ്ക് 34 റണ്‍സ് കണ്ടെത്തിയത്. പൂജാര 39 പന്തുകള്‍ നേരിട്ട് മൂന്ന് ഫോറുകള്‍ സഹിതമാണ് 19 റണ്‍സിലെത്തിയത്. രണ്ടാം വിക്കറ്റില്‍ ഇരുവരും ചേര്‍ന്ന് അര്‍ധ സെഞ്ച്വറി കൂട്ടുകെട്ട് പടുത്തുയര്‍ത്തി.

ഒന്നാം ടെസ്റ്റില്‍ ഓപണറായി സ്ഥാനക്കയറ്റം ലഭിച്ച് കളിക്കാനിറങ്ങി രണ്ടിന്നിങ്‌സിലും സെഞ്ച്വറി നേടിയ രോഹിത് 14 റണ്‍സുമായി മടങ്ങി. 35 പന്തുകളാണ് രോഹിത് നേരിട്ടത്. റബാഡയുടെ പന്തില്‍ വിക്കറ്റ് കീപ്പര്‍ ക്വിന്റന്‍ ഡി കോക്കിന് പിടി നല്‍കിയാണ് ഹിറ്റ്മാന്‍ മടങ്ങിയത്. ഈ മത്സരത്തില്‍ ജയിച്ചാല്‍ മൂന്ന് ടെസ്റ്റുകളുടെ പരമ്പര ഇന്ത്യയ്ക്ക് സ്വന്തമാക്കാം.