പൂനെ: ദക്ഷിണാഫ്രിക്കയ്‌ക്കെതിരായ രണ്ടാം ക്രിക്കറ്റ് ടെസ്റ്റില്‍ ഇന്ത്യ മികച്ച സ്‌കോറിലേക്ക്. ഒന്നാം ദിവസത്തെ കളി അവസാനിക്കുമ്പോള്‍ ഇന്ത്യ മൂന്ന് വിക്കറ്റ് നഷ്ടത്തില്‍ 273 റണ്‍സെന്ന നിലയില്‍. കളി നിര്‍ത്തുമ്പോള്‍ അര്‍ധ സെഞ്ച്വറിയുമായി ക്യാപ്റ്റന്‍ വിരാട് കോഹ്‌ലി (63), വൈസ് ക്യാപ്റ്റന്‍ അജിന്‍ക്യ രഹാനെ (18) എന്നിവരാണ് ക്രീസില്‍. 

ടോസ് നേടി ബാറ്റിങ് തിരഞ്ഞെടുത്ത ഇന്ത്യക്കായി ഓപണര്‍ മായങ്ക് അഗര്‍വാള്‍ സെഞ്ച്വറിയും (108), ചേതേശ്വര്‍ പൂജാര അര്‍ധ സെഞ്ച്വറിയും (58) നേടി മികവ് പുലര്‍ത്തി. ഇന്ത്യക്ക് നഷ്ടമായ മൂന്ന് വിക്കറ്റുകളും സ്വന്തമാക്കിയത് കഗിസോ റബാഡയാണ്. 

പത്ത് ഫോറുകള്‍ സഹിതമാണ് കോഹ്‌ലിയുടെ അര്‍ധ സെഞ്ച്വറി. ആദ്യ ടെസ്റ്റില്‍ ഇരട്ട സെഞ്ച്വറി തികച്ച് മികവ് പുലര്‍ത്തിയ മായങ്ക് രണ്ടാം ടെസ്റ്റിലും ഫോം ആവര്‍ത്തിച്ചു. 195 പന്തുകള്‍ നേരിട്ട് 16 ഫോറുകളും രണ്ട് സിക്‌സും സഹിതമാണ് താരത്തിന്റെ ശതകം. സെഞ്ച്വറി തികച്ച് അധികം വൈകാതെ തന്നെ താരം കൂടാരം കയറി. 

തുടക്കത്തില്‍ രോഹിത് ശര്‍മയെ നഷ്ടമായ ഇന്ത്യയെ മായങ്ക് അഗര്‍വാള്‍, ചേതേശ്വര്‍ പൂജാര സഖ്യമാണ് മുന്നോട്ട് നയിച്ചത്. 58 റണ്‍സെടുത്താണ് പൂജാര മടങ്ങിയത്.  രോഹിത് ശര്‍മ 14റണ്‍സുമായി പുറത്തായി. ഒന്‍പത് ഫോറും ഒരു സിക്‌സും സഹിതമാണ് പൂജാര അര്‍ധ ശതകം കുറിച്ചത്. രണ്ടാം വിക്കറ്റില്‍ മായങ്കിനൊപ്പം 138 റണ്‍സിന്റെ കൂട്ടുകെട്ടാണ് പൂജാര പടുത്തുയര്‍ത്തിയത്.