ലണ്ടൻ: ഇംഗ്ലീഷ് പ്രീമിയർ ലീഗിൽ ഈ സീസണിലെ ഏറ്റവും മികച്ച ഗോളിനുള്ള പുരസ്കാരം ടോട്ടനം ഹോസ്പറിന്റെ ദക്ഷിണ കൊറിയൻ മുന്നേറ്റ താരം സൺ ഹ്യൂങ് മിന്നിന്. ഡിസംബറിൽ ബേൺലിക്ക് എതിരായ മത്സരത്തിൽ സൺ നേടിയ സോളോ ഗോളിനാണ് പുരസ്കാരം.
ബേൺലിയുടെ പെനാൽറ്റി ബോക്സിൽ നിന്ന് പന്ത് സ്വീകരിച്ച് ഒറ്റയ്ക്ക് കുതിച്ച സൺ ആറ് താരങ്ങളെ ഒന്നൊന്നായി വെട്ടിയൊഴിഞ്ഞ് വല ചലിപ്പിക്കുകയായിരുന്നു. മാഞ്ചസ്റ്റർ സിറ്റിയുടെ കെവിൻ ഡി ബ്രുയ്ൻ, മാഞ്ചസ്റ്റർ യുനൈറ്റഡിന്റെ ബ്രൂണോ എന്നിവരെയെല്ലാം പിന്നിലാക്കിയാണ് ടോട്ടനം താരം പുരസ്കാരം സ്വന്തമാക്കിയത്. ആരാധകരുടെ വോട്ട് കൂടി മികച്ച ഗോൾ തിരഞ്ഞെടുക്കുന്നതിൽ നിർണായകമായി.
ബേൺലിക്കെതിരായ മത്സരത്തിൽ എതിരില്ലാത്ത അഞ്ചു ഗോളിനായിരുന്നു ടോട്ടനത്തിന്റെ വിജയം. അന്നു ഹാരി കെയ്ൻ നേടിയ ഇരട്ട ഗോളിനേക്കാളും കാണികളെ ത്രില്ലടിപ്പിച്ചത് സൺ ഉജ്ജ്വല ഒറ്റയാൾ മുന്നേറ്റത്തിലൂടെ നേടിയ ഈ ഗോളായിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ