ഹൊബാർട്ട്: മൂന്ന് വര്‍ഷത്തിനു ശേഷം ടെന്നീസ് കോർട്ടിൽ തിരിച്ചെത്തിയ ഇന്ത്യൻ വനിതാ താരം സാനിയ മിര്‍സ വിജയകുതിപ്പ് തുടരുന്നു. ഹൊബാര്‍ട് ഇന്റര്‍നാഷണല്‍ ടൂര്‍ണമെന്റിലെ വനിതാ ഡബിള്‍സിൽ സാനിയ- കിചെനോക് സഖ്യം സെമിയിലെത്തി. കിം- മക്‌ഹേല്‍ സഖ്യത്തെ ക്വാര്‍ട്ടറില്‍ തോല്‍പിച്ചാണ് സാനിയ സഖ്യം സെമി ബെർത്ത് ഉറപ്പിച്ചത്. സ്‌കോര്‍: 6-2, 4-6, 10-4.

പ്രീ ക്വാര്‍ട്ടറിലെ കടുത്ത പോരാട്ടത്തില്‍ ജോര്‍ജിയയുടെ ഒക്‌സാന കലഷ്‌നികോവ- ജപ്പാന്റെ മിയു കറ്റോ സഖ്യത്തെയാണ് ഇന്തോ- യുക്രൈന്‍ സഖ്യം വീഴ്ത്തിയത്. സ്‌കോര്‍: 2-6, 7-6 (7-3), 10-3. സെമിയില്‍ സ്ലോവേനിയ താരം തമാര സിഡാന്‍സെക്ക് - ചെക്ക് റിപ്ലബ്ലിക്കിന്റെ മാരി ബൗസ്‌കോവ ജോടിയുമായാണ് സാനിയയും കിച്ചെനോക്കും മാറ്റുരയ്ക്കുക.

2017 ഒക്ടോബറില്‍ ചൈന ഓപണിലാണ് സാനിയ അവസാനമായി കളിച്ചത്. പരിക്കിനെ തുടര്‍ന്നായിരുന്നു പിന്‍മാറ്റം. പിന്നീട് കുഞ്ഞിന്റെ ജനന ശേഷമാണ് മൂന്ന് വര്‍ഷത്തെ ഇടവേള അവസാനിപ്പിച്ച് താരം കളത്തില്‍ തിരിച്ചെത്തിയത്.