സതാംപ്ടണ്‍: ടെസ്റ്റ് ക്രിക്കറ്റില്‍ 4000 റണ്‍സും, 150 വിക്കറ്റും പിന്നിട്ട് ഇംഗ്ലണ്ട് ഓള്‍ റൗണ്ടര്‍ ബെന്‍ സ്റ്റോക്ക്‌സ്. ഈ നേട്ടത്തിലേക്ക് വേഗത്തില്‍ എത്തുന്ന രണ്ടാമത്തെ താരമാണ് സ്‌റ്റോക്ക്‌സ്. 

ഇംഗ്ലണ്ട്-വിന്‍ഡിസ് ടെസ്റ്റിന്റെ മൂന്നാം ദിനം അല്‍സാരി ജോസഫിന്റെ വിക്കറ്റ് വീഴ്ത്തിയാണ് സ്റ്റോക്ക്‌സ് 150 വിക്കറ്റ് എന്ന നേട്ടം തികച്ചത്. ടെസ്റ്റില്‍ 150 വിക്കറ്റും 4000 റണ്‍സും നേടുന്ന ആറാമത്തെ മാത്രം താരമാണ് സ്‌റ്റോക്ക്‌സ്. 

ഗാരി സോബേഴ്‌സ്, ഇയാന്‍ ബോതം, കപില്‍ ദേവ്, ജാക്ക് കാലിസ്, ഡാനിയേല്‍ വെറ്റോറി എന്നിവരാണ് സ്റ്റോക്ക്‌സിന് മുന്‍പ് ഈ നേട്ടം സ്വന്തമാക്കിയത്. 64ാമത്തെ ടെസ്റ്റിലാണ് സ്റ്റോക്ക്‌സ് നേട്ടക്കിലേക്ക് എത്തിയത്. 

ബൗളിങ്ങിന് സാധ്യതയുള്ള പിച്ചില്‍ ടോസ് നേടിയിട്ടും ബാറ്റിങ് തെരഞ്ഞെടുത്ത് സ്‌റ്റോക്ക്‌സ് ആദ്യ ദിനം ടീമിനെ പിന്നോട്ടടിച്ചിരുന്നു. എന്നാല്‍ മൂന്നാം ദിനം നാല് വിക്കറ്റ് വീഴ്ത്തി ടീമിനേറ്റ ആഘാതം പരിമിതപ്പെടുത്താന്‍ സ്റ്റോക്ക്‌സിനായി. 99 റണ്‍സിന്റെ ലീഡാണ് വിന്‍ഡിസിന് ഇപ്പോഴുള്ളത്.