മുംബൈ: കൊറോണ വൈറസിന്റെ പശ്ചാത്തലത്തില്‍ ഐപിഎല്‍ മാറ്റി വെക്കണമെന്ന പ്രതികരണവുമായി മഹാരാഷ്ട്ര ആരോഗ്യ മന്ത്രി. രാജ്യത്ത് കൊറോണ വൈറസ് സ്ഥിരീകരിച്ചവരുടെ എണ്ണം കൂടി വരുന്ന സാഹചര്യത്തില്‍ ഐപിഎല്‍ മാറ്റി വെക്കണമെന്ന മുറവിളി ഉയരുന്നതിന് ഇടയിലാണ് മഹാരാഷ്ട്ര മന്ത്രിയുടെ പ്രതികരണം.
ഒരു വലിയ സംഘം ആളുകള്‍ ഒരിടത്ത് ഒരേ സമയം കൂടുന്നത് ഈ സാഹചര്യത്തില്‍ അപകടകരമാണ്. ഐപിഎല്‍ പോലുള്ളവ മാറ്റി വെക്കാവുന്നതാണ്, മഹാരാഷ്ട്ര ആരോഗ്യ മന്ത്രി രാജേഷ് തോപ്പേ പറഞ്ഞു. ഐപിഎല്‍ മാറ്റി വെക്കുന്നതുമായി ബന്ധപ്പെട്ട തീരുമാനം ഉടനെടുക്കുമെന്നും അദ്ദേഹം വ്യക്തമാക്കി.
മാര്‍ച്ച് 29നാണ് ഐപിഎല്‍ ആരംഭിക്കുന്നത്. ടൂര്‍ണമെന്റ് മാറ്റി വെക്കേണ്ട സാഹചര്യം നിലവില്‍ ഇല്ലെന്നാണ് ബിസിസിഐ പ്രസിഡന്റ് സൗരവ് ഗാംഗുലി ഉള്‍പ്പെടെയുള്ളവര്‍ സ്വീകരിക്കുന്നത്. കൊറോണ വൈറസിന്റെ പശ്ചാത്തലത്തില്‍ എല്ലാ മുന്‍കരുതലുകളും സ്വീകരിക്കുമെന്നും ഗാംഗുലി പറഞ്ഞിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ