പഞ്ചാബിനെതിരെ നേടിയ പത്ത് വിക്കറ്റിന്റെ കൂറ്റന്‍ ജയത്തോടെ കളിയില്‍ തിരിച്ചെത്തിയിരിക്കുകയാണ് ചെന്നൈ സൂപ്പര്‍ കിങ്‌സ്. ഒന്നിനുപിറകെ ഒന്നായി മൂന്ന് വട്ടം പരാജയപ്പെട്ട ടീം ഈ ജയത്തോടെ ശക്തമായ തിരിച്ചുവരവാണ് നടത്തിയിരിക്കുന്നത്. ചെറിയ ചെറിയ കാര്യങ്ങള്‍ ശരിയാക്കിയതാണ് വിജയത്തിന് വഴിയൊരുക്കിയതെന്നാണ് ചെന്നൈ നായകന്‍ മഹേന്ദ്ര സിങ് ധോനി പറയുന്നത്. 

'ഞങ്ങള്‍ ചെറിയ കാര്യങ്ങള്‍ ശരിയായി ചെയ്തു എന്നാണ് എനിക്ക് തോന്നുന്നത്. ഞങ്ങള്‍ക്ക് അതുതന്നെയാണ് പ്രധാനം. ബാറ്റങ്ങില്‍ ഞങ്ങള്‍ക്ക് കിട്ടിയ തുടക്കം ആയിരുന്നു വേണ്ടിയിരുന്നത്. വരുന്ന മത്സരങ്ങളിലും ഇത് തുടരാന്‍ കഴിയുമെന്ന് പ്രതീക്ഷിക്കുന്നു', മത്സരശേഷം ധോനി പറഞ്ഞു. 

ടീം കോച്ച് സ്റ്റീഫന്‍ ഫ്‌ളെമിങിനാണ് വിജയത്തിന്റെ ക്രെഡിറ്റ് ധോനി നല്‍കുന്നത്. തര്‍ക്കങ്ങള്‍ ഉണ്ടാകുമെങ്കിലും ഒരു പ്ലാനുമായാണ് മുന്നോട്ടുപോകുന്നതെന്നും അതാണ് തങ്ങള്‍ക്കിടയിലെ ബന്ധമെന്നും ധോനി പറഞ്ഞു. 

ചെന്നൈ ഓപ്പണർമാരായ ഷെയ്ൻ വാട്ട്‌സണും ഫാഫ് ഡുപ്ലെസിയും നിറഞ്ഞാടിയ മത്സരത്തിൽ കിങ്‌സ് ഇലവൻ പഞ്ചാബിനെതിരെ 10 വിക്കറ്റിനാണ് ടീം ജയിച്ചത്. പഞ്ചാബ് ഉയർത്തിയ 179 റൺസ് വിജയലക്ഷ്യം വെറും 17.4 ഓവറിൽ മറികടക്കുകയായിരുന്നു ചെന്നൈ. ഒരു വിക്കറ്റ് പോലും നഷ്ടപ്പെടാതെയാണ് ചെന്നൈ ജയം തൊട്ടത്.