ബ്രിസ്ബെയ്ൻ: ടെസ്റ്റ് ക്രിക്കറ്റിലെ മറ്റൊരു അപൂർവ റെക്കോർഡ് സ്വന്തം പേരിലാക്കി ഓസ്ട്രേലിയൻ താരം സ്റ്റീവ് സ്മിത്ത്. ടെസ്റ്റ് ക്രിക്കറ്റിൽ ഏറ്റവും വേ​ഗതയിൽ 7500 റൺസ് തികയ്ക്കുന്ന താരമെന്ന നേട്ടമാണ് ഓസീസ് മുൻ നായകൻ സ്വന്തമാക്കിയത്. ഇന്ത്യക്കെതിരായ പോരാട്ടത്തിന്റെ നാലാം ദിനത്തിലാണ് സ്മിത്തിന്റെ നേട്ടം. ഇന്ത്യൻ ഇതിഹാസങ്ങളായ സച്ചിൻ ടെണ്ടുൽക്കർ, വീരേന്ദർ സെവാ​ഗ് എന്നിവരുടെ റെക്കോർഡാണ് സ്മിത്ത് പഴങ്കഥയാക്കിയത്.

ബ്രിസ്‌ബെയ്‌നിൽ രണ്ടാം ഇന്നിങ്‌സിൽ 55 റൺസായിരുന്നു സ്മിത്തിന്റെ സമ്പാദ്യം. 139 ഇന്നിങ്‌സുകളിൽ നിന്നാണ് സ്മിത്ത് 7500 റൺസ് തികച്ചത്. 144 ഇന്നിങ്‌സുകളിൽ നിന്ന് ഈ നേട്ടം സ്വന്തമാക്കിയ സച്ചിൻ ടെണ്ടുൽക്കർ, വീരേന്ദർ സെവാഗ് എന്നിവരായിരുന്നു ഇതുവരെ ഈ റെക്കോർഡ് സ്വന്തമാക്കിയവർ. ഇരുവരേയും രണ്ടാം സ്ഥാനത്തേക്ക് പിന്തള്ളിയാണ് സ്മിത്ത് റെക്കോർഡിൽ സ്വന്തം പേര് എഴുത് ചേർത്തത്.

147 ഇന്നിങ്‌സുകളിൽ നിന്ന് ഈ നേട്ടം സ്വന്തമാക്കിയ വെസ്റ്റിൻഡീസിന്റെ ഗാരി സോബേഴ്‌സ്, ശ്രീലങ്കയുടെ കുമാർ സംഗക്കാര എന്നിവരാണ് പട്ടികയിലെ മറ്റ് താരങ്ങൾ. രാഹുൽ ദ്രാവിഡ് 148 ഇന്നിങ്‌സുകളിൽ നിന്നാണ് ഈ നേട്ടം സ്വന്തമാക്കിയത്. ഈ നേട്ടത്തിനൊപ്പം തന്നെ മറ്റൊരു പെരുമയും സ്മിത്ത് നേടി. ടെസ്റ്റിൽ ഓസ്‌ട്രേലിയയുടെ റൺ വേട്ടക്കാരുടെ പട്ടികയിൽ മുൻ ക്യാപ്റ്റൻ മാർക്ക് ടെയ്‌ലറെ മറികടന്ന് സ്മിത്ത് എട്ടാം സ്ഥാനത്തേക്ക് കയറി.