ദുബായി: സുപ്രധാന തീരുമാനങ്ങളുമായി ഐസിസി. എട്ട് ടീമുകളെ പങ്കെടുപ്പിച്ച് ചാമ്പ്യൻസ് ട്രോഫി തിരികെ കൊണ്ടുവരുന്നു. 2024-31 സമയത്തെ ഏക​ദിന, ട്വി20 ലോകകപ്പുകളിൽ കളിക്കുന്ന രാജ്യങ്ങളുടെ എണ്ണവും ഐസിസി വർധിപ്പിച്ചു. 

2024, 2028 വർഷത്തെ ചാമ്പ്യൻസ് ട്രോഫിയാണ് ഐസിസി ഇപ്പോൾ പ്രഖ്യാപിച്ചിരിക്കുന്നത്. രണ്ട് ​ഗ്രൂപ്പുകളിലായി തിരിഞ്ഞ് നാല് വീതം ടീമുകൾ എന്ന നിലയിലാണ് ഇത്തവണയും ഫോർമാറ്റ്. നിലവിൽ 16 രാജ്യങ്ങളാണ് ടി20 ലോകകപ്പ് കളിക്കുന്നത്. ഇത് 2024-31 സമയം 20 ടീമുകളായി മാറും. ഈ കാലയളവിൽ നാല് ടി20 ലോകകപ്പുകളാണ് നടത്തുക. 55 മത്സരങ്ങളാവും ഉണ്ടാവുക. 

2019 ലോകകപ്പ് സമയം ടീമുകളുടെ എണ്ണം 10 ആയി കുറച്ചിരുന്നു. ഇത് 2027ൽ 14 ആയി ഉയർത്തും. രണ്ട് ​ഗ്രൂപ്പുകളിലായി തിരിച്ച് ഏഴ് വീതം ടീമുകളാണ് ഉണ്ടാവുക. ഇവയിൽ നിന്ന് ടോപ് 3 ടീമുകൾ സൂപ്പർ സിക്സിലേക്ക് എത്തും. ടി20 ലോകകപ്പിൽ 4 ​ഗ്രൂപ്പുകളിലായി 5 വീതം ടീമുകളുണ്ടാവും. ടോപ് 2 ടീമുകൾ സൂപ്പർ 8ലേക്ക് എത്തും. 

ലോക ടെസ്റ്റ് ചാമ്പ്യൻഷിപ്പ് തുടരാനാണ് ഐസിസിയുടെ തീരുമാനം. ഇനി 2025, 2027, 2029, 2031 വർഷങ്ങളിലാണ് ലോക ടെസ്റ്റ് ചാമ്പ്യൻഷിപ്പ് ഫൈനൽ. 2023ൽ ടെസ്റ്റ് ചാമ്പ്യൻഷിപ്പ് ഫൈനൽ ഉണ്ടാവുമോ എന്നതിൽ വ്യക്തത വന്നിട്ടില്ല.