ടെസ്റ്റ് ക്രിക്കറ്റ് കളിക്കാൻ താല്‍പ്പര്യമില്ലെന്ന തരത്തിൽ തന്റെപേരിൽ പുറത്തുവന്ന വാർത്തകൾ തള്ളി ഇന്ത്യൻ താരം ഭുവനേശ്വര്‍ കുമാര്‍. ടെസ്റ്റ് ക്രിക്കറ്റ് കളിക്കാൻ ഭുവനേശ്വർ കുമാർ ഇനി താത്പര്യപ്പെടുന്നില്ലെന്ന തരത്തിലാണ് വാർത്തകൾ പുറത്തുവന്നത്. ഭുവിയോട് അടുത്ത വൃത്തങ്ങളെ ഉദ്ധരിച്ച് ദേശിയ മാധ്യമങ്ങളാണ് വാർത്ത പുറത്തുവിട്ടത്. എന്നാല്‍ ഇതു ശുദ്ധ അസംബന്ധമാണെന്നു ഭുവി ട്വിറ്ററില്‍ കുറിച്ചു.
"എനിക്കു ഇനി ടെസ്റ്റ് ക്രിക്കറ്റില്‍ കളിക്കാന്‍ ആഗ്രഹമില്ലെന്ന തരത്തില്‍ ചില റിപ്പോര്‍ട്ടുകള്‍ ശ്രദ്ധയില്‍പ്പെട്ടു. ഇക്കാര്യത്തില്‍ വിശദീകരണം നല്‍കുന്നതിനു വേണ്ടിയാണിത്. ടീം സെലക്ഷനെക്കുറിച്ച് ചിന്തിക്കാതെയാണ് മൂന്നു ഫോര്‍മാറ്റുകള്‍ക്കും വേണ്ടി ഞാന്‍ തയ്യാറെടുപ്പുകള്‍ നടത്താറുള്ളത്. തുടര്‍ന്നും ഇതു തന്നെ ചെയ്യും.
നിര്‍ദേശം- ഉറവിടങ്ങളെ അടിസ്ഥാനമാക്കി നിങ്ങളുടെ നിഗമനങ്ങള്‍ ദയവു ചെയ്ത് എഴുതരുത്", ഭുവി ട്വീറ്റ് ചെയ്തു.
ഇന്ത്യയുടെ ഇംഗ്ലണ്ട് പര്യടനത്തിനുള്ള ടീമിലേക്ക് ഭുവിയെ പരിഗണിച്ചിരുന്നില്ല. വൈറ്റ് ബോൾ ക്രിക്കറ്റിൽ ശ്രദ്ധ കേന്ദ്രീകരിക്കാനാണ് ഭുവിയുടെ നീക്കമെന്നായിരുന്നു റിപ്പോർട്ടുകളിൽ പറഞ്ഞിരുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ