കറാച്ചി: പാക് പേസിന്റെ നവീന മുഖമാണ് ഷഹീന്‍ ഷാ അഫ്രീദി. പാകിസ്ഥാന്‍ സൂപ്പര്‍ ലീഗില്‍ ലാഹോര്‍ ക്വാലന്റേഴ്‌സിന്റെ ക്യാപ്റ്റന്‍ കൂടിയാണ് ഷഹീന്‍. ഇപ്പോള്‍ താരത്തിന്റെ പിഎസ്എല്ലിലെ ഒരു ഓവറാണ് ശ്രദ്ധേയമാകുന്നത്.
പെഷവാര്‍ സാല്‍മിക്കെതിരായ പോരാട്ടത്തിലാണ് കൗതുകം ജനിപ്പിച്ച ഈ ഓവര്‍. മത്സരത്തില്‍ 242 റണ്‍സെന്ന കൂറ്റന്‍ ലക്ഷ്യമാണ് ലാഹോര്‍ പെഷവാറിന് മുന്നില്‍ വച്ചത്.
വിജയം തേടിയിറങ്ങിയ പെഷവാറിന്റെ ആദ്യ ഓവറില്‍ തന്നെയാണ് കൗതുകം ജനിപ്പിച്ച രംഗങ്ങള്‍ പിറന്നത്. മത്സരത്തില്‍ അഞ്ച് വിക്കറ്റുകള്‍ വീഴ്ത്തി ലാഹോറിന്റെ കുതിപ്പില്‍ നിര്‍ണായക പങ്കു വഹിച്ച ഷഹീനാണ് ആദ്യ ഓവര്‍ എറിഞ്ഞത്.
ആദ്യ പന്തില്‍ തന്നെ പെഷവാര്‍ ഓപ്പണര്‍ മുഹമ്മദ് ഹാരിസിന്റെ ബാറ്റ് രണ്ട് കഷ്ണമാക്കി ഷഹീന്‍. പുതിയ ബാറ്റുമായി ക്രീസിലെത്തിയ മുഹമ്മദ് ഹാരിസ് രണ്ടാം പന്ത് പ്രതിരോധിക്കാന്‍ ശ്രമിക്കവേ കുറ്റി പിഴുതെറിഞ്ഞാണ് ആ പന്ത് മൂളിപ്പറന്നത്. രണ്ട് പന്തിലും അസാധ്യമായ പേസ് നിറച്ചാണ് ഷഹീന്‍ എറിഞ്ഞത്. ഇതിന്റെ വീഡിയോ ഇപ്പോള്‍ വൈറലാണ്.
മത്സരത്തില്‍ ലാഹോര്‍ 40 റണ്‍സിന് വിജയിച്ചു. കൂറ്റന്‍ ലക്ഷ്യത്തിലേക്ക് ബാറ്റേന്തിയ പെഷവാറിന്റെ പോരാട്ടം 201 റണ്‍സില്‍ അവസാനിച്ചു.
ഈ വാര്‍ത്ത കൂടി വായിക്കൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ