മുംബൈ: ടി 20 ക്രിക്കറ്റില്‍ ഇന്ത്യന്‍ ക്രിക്കറ്റ് താരവും മുംബൈ ഇന്ത്യന്‍സ് ടീം അംഗവുമായ സൂര്യകുമാര്‍ യാദവിന് നേട്ടം. ടി 20 ക്രിക്കറ്റില്‍ ഏഴായിരം റണ്‍സ് തികയ്ക്കുന്ന എട്ടാമത്തെ ഇന്ത്യന്‍ താരമായി സൂര്യകുമാര്‍ യാദവ്. ഐപിഎല്ലില്‍ ബംഗളൂരുവിനെതിരായ മത്സരത്തിലാണ് സൂര്യകുമാര്‍ യാദവ് നേട്ടം സ്വന്തമാക്കിയത്. 31 റണ്‍സ് അടിച്ചുനില്‍ക്കുമ്പോഴാണ് റെക്കോര്‍ഡ് ബുക്കില്‍ ഇടംപിടിച്ചത്.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

മത്സരത്തില്‍ ബംഗളൂരുവിനെ പരാജയപ്പെടുത്തുന്നതില്‍ നിര്‍ണായക പങ്കാണ് സൂര്യകുമാര്‍ യാദവ് വഹിച്ചത്. പരിക്ക് ഭേദമായി ടീമിലെത്തിയ ആദ്യ കളിയില്‍ നിരാശപ്പെടുത്തിയ സൂര്യകുമാര്‍ പഴയ പ്രതാപം വീണ്ടെടുക്കുന്നതാണ് ഇന്നലെ കണ്ടത്. 17 പന്തില്‍ അര്‍ധ സെഞ്ച്വറി തികച്ച് ബംഗളൂരുവിനെതിരെ താണ്ഡവം ആടുകയായിരുന്നു സൂര്യകുമാര്‍ യാദവ്. ബംഗളൂരു കൂറ്റന്‍ സ്‌കോര്‍ അടിച്ചിട്ടും മുംബൈ ഇന്ത്യന്‍സ് അനായാസം മറികടന്നു. 15.3 ഓവറിലായിരുന്നു മുംബൈ ഇന്ത്യന്‍സിന്റെ വിജയം.

വിരാട് കോഹ് ലി (12,313), രോഹിത് ശര്‍മ( 11,312), ശിഖര്‍ ധവാന്‍ (9797) തുടങ്ങിയ ഇന്ത്യന്‍ താരങ്ങളാണ് സൂര്യകുമാര്‍ യാദവിന് മുന്നില്‍. ഐപിഎല്ലില്‍ മാത്രം സൂര്യകുമാര്‍ യാദവിന് 3300ലധികം റണ്‍സുണ്ട്.