പത്തനംതിട്ട: പത്തനംതിട്ടയില്‍ പ്രണയം നിരസിച്ച പെണ്‍കുട്ടിയെ പെട്രോളൊഴിച്ച് തീകൊളുത്തിയ പ്രതി പിടിയല്‍ . കടമ്മിനിട്ട സ്വദേശി സജിലാണ് അറസ്റ്റിലായത്. ശരീരം മുഴുവന്‍ പൊള്ളലേറ്റ നിലയിലാണ് സജിലിനെ കണ്ടെത്തിയത്. ആളൊഴിഞ്ഞ വീട്ടില്‍ നിന്നാണ് പ്രതി പൊലിസ് പിടിയിലാകുന്നത്. ഇന്നലെ രാത്രി 7.30 ഓടെയാണ് സംഭവം നടന്നത്. അതേസമയം ഗുരുതരമായി പൊള്ളലേറ്റ പെണ്‍കുട്ടി കോട്ടയം മെഡിക്കല്‍ കോളേജില്‍ ചികിത്സയിലാണ്. 

പെണ്‍കുട്ടിയും കൃത്യം നടത്തിയ സജിലും തമ്മില്‍ അടുപ്പത്തിലായിരുന്നുവെന്നാണ് പൊലീസ് പറയുന്നത്. പഠനം നിര്‍ത്തിയ പെണ്‍കുട്ടി പത്തനംതിട്ടയിലെ വസതിയിലായിരുന്നു. മാതാപിതാക്കള്‍ വീട്ടില്‍ ഇല്ലാതിരുന്ന സമയത്താണ് സംഭവം നടന്നത്. വൈകീട്ട് വീടിന് സമീപം ചെന്ന് യുവാവ് പെണ്‍കുട്ടിയോട് ഇറങ്ങിവരാന്‍ ആവശ്യപ്പെടുകയായിരുന്നു. എന്നാല്‍ പെണ്‍കുട്ടി ഇതിന് തയ്യാറായില്ല. ഒരു മണിക്കൂറിന് ശേഷം പെട്രോളുമായി എത്തിയ സജിന്‍ വീട്ടില്‍ കയറി ചൊല്ലുകയും പെട്രോള്‍ ഒഴിച്ച് തീ കൊളുത്തുകയായിരുന്നു.