തൃശൂര്‍: പൂരങ്ങളുടെ പൂരമായ തൃശൂര്‍ പൂരത്തിന് തുടക്കമായി. ഇരുനൂറ്റി ഇരുപതാമത് പൂരമാണ് നടക്കുന്നത്. പുലര്‍ച്ചെ അഞ്ച് മണിയോടെ ഘടകക്ഷേത്രമായ കണിമംഗലം ശാസ്താവിന്റെ എഴുന്നെള്ളത്തോടെയാണ് പൂരത്തിന് തുടക്കം കുറിച്ചത്. മറ്റ് ഘടക പൂരങ്ങളും പൂരപ്പറമ്പിലേക്ക് എത്തിക്കൊണ്ടിരിക്കുകയാണ്. 11 മണിയോടെ കോങ്ങാട് മധു നയിക്കുന്ന മഠത്തില്‍വരവ് പഞ്ചവാദ്യവും ഉച്ചയ്ക്ക് രണ്ട് മണിയോടെ പെരുവനം കുട്ടന്‍മാരാരും സംഘവും തീര്‍ക്കുന്ന ഇലഞ്ഞിത്തറമേളവും ആരംഭിക്കും.  വൈകിട്ട് അഞ്ചരയോടെയാണ് കുടമാറ്റം നടക്കുക.പരമ്പരാഗത വെടിക്കെട്ടിന് അനുമതി ലഭിച്ചതോടെ പൂരത്തിന്റെ പ്രൗഡി കുറയുമോ എന്ന പേടി പൂരപ്രേമികളില്‍ നിന്നും ഇല്ലാതായിരിക്കുകയാണ്.കനത്ത സുരക്ഷയാണ് ഇത്തവണ ഒരുക്കിയിരിക്കുന്നത്.