തിരുവനന്തപുരം : രജപുത്ര വികാരം വ്രണപ്പെടുത്തിയെന്ന ആരോപണത്തെ തുടര്‍ന്ന് വിവാദത്തിലായ ചലച്ചിത്രം പദ്മാവതി കേരളത്തില്‍ റീലീസ് ചെയ്യണമെന്ന് കോണ്‍ഗ്രസ്. കെപിസിസി അധ്യക്ഷന്‍ എംഎം ഹസ്സന്‍ ഇക്കാര്യം ആവശ്യപ്പെട്ട് മുഖ്യമന്ത്രി പിണറായി വിജയന് കത്ത് നല്‍കി. ചിത്രം റീലീസ് ചെയ്യുന്ന തീയേറ്ററുകള്‍ കത്തിക്കുമെന്ന സംഘപരിവാര്‍ സംഘടനകളുടെ ഭീഷണി നിലനില്‍ക്കുന്നതിനിടെയാണ്, ചിത്രം കേരളത്തില്‍ പ്രദര്‍ശിപ്പിക്കണമെന്ന ആവശ്യവുമായി കോണ്‍ഗ്രസ് രംഗത്തെത്തിയത്.
സഞ്ജയ് ലീല ബന്‍സാലി, ദീപിക പദുക്കോണിനെ നായികയാക്കി ഒരുക്കിയ ചിത്രമാണ് പദ്മാവതി. ചിത്രത്തില്‍ രജപുത്ര രാജ്ഞിയായ പദ്മാവതിയെ ചിത്രീകരിച്ചിരിക്കുന്നത് ചരിത്രം വളച്ചൊടിച്ചാണെന്നും, മതവികാരത്തെ വ്രണപ്പെടുത്തുന്നതാണെന്നും ചൂണ്ടിക്കാട്ടി രജപുത്ര സംഘടനയായ കര്‍ണി സേനയും സംഘപരിവാര്‍ സംഘടനകളും രംഗത്തെത്തുകയായിരുന്നു. സിനിമ രാജ്യത്ത് എവിടെ പ്രദര്‍ശിപ്പിച്ചാലും ആ തീയേറ്ററുകള്‍ കത്തിക്കുമെന്നും കര്‍ണി സേന തലവന്‍ സുക്‌ദേവ് സിംഗ് ഭീഷണി മുഴക്കിയിരുന്നു.
ചിത്രത്തിന്റെ സംവിധായകനായ സഞ്ജയ് ലീല ബന്‍സാലിയ്ക്കും, നായി ദീപിക പദുക്കോണിനുമെതിരെ സംഘപരിവാര്‍ നേതാക്കള്‍ ഭീഷണി മുഴക്കിയിരുന്നു. ശൂര്‍പ്പണഖയുടെ ഗതി നേരിടേണ്ടി വരുമെന്ന് സംഘപരിവാര്‍ നേതാവ് ഭീഷണിപ്പെടുത്തിയിരുന്നു. ഡിസംബര്‍ ഒന്നിന് ചിത്രം റിലീസ് ചെയ്യുമെന്നാണ് പ്രഖ്യാപിച്ചിരുന്നത്. എന്നാല്‍ ചരിത്രം വളച്ചൊടിച്ചെന്ന ആരോപണത്തെ തുടര്‍ന്നുള്ള പ്രക്ഷോഭം രൂക്ഷമായ സാഹചര്യത്തില്‍ ചിത്രത്തിന്റെ റിലീസ് നീട്ടിവെച്ചിരിക്കുകയാണ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ