വേങ്ങര ഉപതെരഞ്ഞെടുപ്പില്‍ പി.പി.ബഷീറിനെ സിപിഎം സ്ഥാനാര്‍ഥിയായി ഔദ്യോഗികമായി പ്രഖ്യാപിച്ചു. മലപ്പുറം ജില്ലാ സെക്രട്ടറിയേറ്റിന്റെ നിര്‍ദേശം അംഗീകരിച്ചാണ് സിപിഎം സംസ്ഥാന സെക്രട്ടറിയേറ്റ് പി.പി.ബഷീറിനെ സ്ഥാനാര്‍ഥിയായി പ്രഖ്യാപിച്ചിരിക്കുന്നത്.
2016ലെ തെരഞ്ഞെടുപ്പില്‍ കുഞ്ഞാലിക്കുട്ടിക്കെതിരെ മത്സരിച്ചപ്പോള്‍ മികച്ച പ്രകടനം നടത്താന്‍ ബഷീറിനായിരുന്നു. ഈ പ്രകടനം ആവര്‍ത്തിക്കാനാകുമെന്ന പ്രതീക്ഷയിലാണ് വേങ്ങരയില്‍ ബഷീറിനെ എല്‍ഡിഎഫ് സ്ഥാനാര്‍ഥിയാക്കുന്നത്‌.
സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെ നേതൃത്വത്തില്‍ ചേര്‍ന്ന മലപ്പുറം ജില്ലാ സെക്രട്ടറിയേറ്റിലായിരുന്നു പി.പി.ബഷീറിനെ സ്ഥാനാര്‍ഥിയാക്കാനുള്ള ധാരണയുണ്ടായത്. സിപിഎം സംസ്ഥാന സെക്രട്ടറിയേറ്റ് കേന്ദ്ര കമ്മിറ്റിയുടെ നിര്‍ദേശം കൂടി ആരാഞ്ഞതിന് ശേഷമാണ് ബഷീറിനെ വേങ്ങരയിലെ സ്ഥാനാര്‍ഥിയായി പ്രഖ്യാപിച്ചിരിക്കുന്നത്.
ഉപതെരഞ്ഞെടുപ്പില്‍ എല്‍ഡിഎഫ് വന്‍ മുന്നേറ്റമുണ്ടാകുമെന്ന് സ്ഥാനാര്‍ഥി പ്രഖ്യാപനത്തിന് ശേഷം പി.പി.ബഷീര്‍ പറഞ്ഞു. കഴിഞ്ഞ തെരഞ്ഞെടുപ്പില്‍ യുഡിഎഫ് നല്‍കിയ വാഗ്ദാനങ്ങള്‍ തിരികെ ആയുധമാക്കുമെന്നും അദ്ദേഹം പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ