തിരുവനന്തപുരം ; പ്രളയക്കെടുതിയില്‍ ദുരിതമനുഭവിക്കുന്ന കേരളത്തിന് കൈത്താങ്ങായി റിലയന്‍സ്. മുഖ്യമന്ത്രിയുടെ ദുരിതാശ്വാസനിധിയിലേക്ക് 21 കോടി രൂപ നല്‍കും. 50 കോടി രൂപയുടെ  അവശ്യവസ്തുക്കളും കേരളത്തിലെത്തിക്കുമെന്നും റിലയന്‍സ് അറിയിച്ചു

മുഖ്യമന്ത്രിയുടെ ദുരിതാശ്വാസ നിധിയിലേക്ക് ഇതുവരെ 210 കോടി രൂപ സംഭാവന ലഭിച്ചതായി മുഖ്യമന്ത്രി പിണറായി വിജയന്‍ അറിയിച്ചു. ഇതിനുപുറമേ 160 കോടി രൂപയുടെ സഹായ വാഗ്ദാനവും ലഭിച്ചിട്ടുള്ളതായി മുഖ്യമന്ത്രി പിണറായി വിജയന്‍ അറിയിച്ചു. ചെക്ക്, ഡ്രാഫ്റ്റ് എന്നിവ വഴിയും അക്കൗണ്ടില്‍ നേരിട്ടും നിക്ഷേപിച്ച തുകയാണിത്. 

ലോകത്തിന്റെ വിവിധ ഭാഗങ്ങളില്‍ നിന്നായി ദുരിതാശ്വാസനിധിയിലേക്കുള്ള ധനസമാഹരണത്തിന് മികച്ച പിന്തുണയാണ് കിട്ടുന്നതെന്നും മുഖ്യമന്ത്രി പറഞ്ഞു. ഓണ്‍ലൈന്‍ പേയ്‌മെന്റ് പോര്‍ട്ടല്‍ വഴി ഇതുവരെ ലഭിച്ച തുക 87 കോടി രൂപയാണ്. രണ്ട് ലക്ഷത്തില്‍പ്പരമാളുകള്‍ ഓണ്‍ലൈനായി സംഭാവനനല്‍കി. നിലവില്‍ 57 ബാങ്കുകളും പണമിടപാട് ശൃംഖലകളും ഇതുമായി ബന്ധിപ്പിച്ചിട്ടുണ്ട്. കൂടുതല്‍ അന്താരാഷ്ട്ര പണമിടപാട് സ്ഥാപനങ്ങളെ ഇതുമായി ബന്ധിപ്പിക്കാനും ശ്രമം നടക്കുന്നു മുഖ്യമന്ത്രി ഓഫീസ് പത്രക്കുറിപ്പില്‍ പറഞ്ഞു.