കണ്ണൂര്‍: ഫുട്‌ബോള്‍ പരിശീലനത്തിന്റെ മറവില്‍ കുട്ടികളെ പ്രകൃതി വിരുദ്ധ ലൈംഗികാതിക്രമത്തിന് ഇരയാക്കിയ കോഴിക്കോട് സ്വദേശി അറസ്റ്റില്‍. ഒളവണ്ണ സ്വദേശിയായ ഫസല്‍ റഹ്മാനാണ് കണ്ണൂര്‍ ടൗണ്‍ പൊലീസിന്റെ പിടിയിലായത്. നൂറിലധികം പീഡന ദൃശ്യങ്ങള്‍ ഇയാളുടെ പക്കല്‍ നിന്ന് പൊലീസ് കണ്ടെടുത്തു.
അല്‍ ജസീറ ഫുട്‌ബോള്‍ ക്ലബ് എന്ന പേരില്‍ ഫെയ്‌സ്ബുക്ക് പേജിലൂടെയാണ് ഫുട്‌ബോള്‍ പരിശീലനത്തിന് താത്പര്യമുള്ള ആണ്‍കുട്ടികളെ ഇയാള്‍ വലയിലാക്കിയത്. പരിശീലനത്തിനെത്തുന്ന കുട്ടികളെ വാടക മുറിയില്‍ എത്തിച്ച് പീഡിപ്പിക്കുകയും ചിത്രങ്ങള്‍ ക്യാമറയില്‍ പകര്‍ത്തുകയും ചെയ്തതായാണ് പരാതി. ചൈല്‍ഡ് ലൈന്‍ പ്രവര്‍ത്തകര്‍ക്ക് ലഭിച്ച പരാതിയുടെ അടിസ്ഥാനത്തില്‍ നടത്തിയ അന്വേഷണത്തിലാണ് ഫസല്‍ റഫ്മാനെ അറസ്റ്റ് ചെയ്തത്. ഇയാള്‍ക്കെതിരെ പോക്‌സോ ഉള്‍പ്പടെയുള്ള വകുപ്പുകള്‍ ചുമത്തി.
പതിനഞ്ചോളം കുട്ടികളെ പ്രതി ലൈംഗികമായി പീഡിപ്പിച്ചതായി ചോദ്യം ചെയ്യലിലൂടെയും പെന്‍ ഡ്രൈവ് പരിശോധിച്ചതിലൂടെയും മനസിലായതായി പൊലീസ് പറഞ്ഞു. നൂറിലധികം പീഡന ദൃശ്യങ്ങള്‍ ഇയാളുടെ കൈവശമുണ്ടായിരുന്ന പെന്‍ഡ്രൈവില്‍ നിന്ന് കണ്ടെടുത്തു. ദൃശ്യങ്ങള്‍ അശ്ലീല സൈറ്റുകളില്‍ അപ്‌ലോഡ് ചെയ്തിട്ടുണ്ടോ എന്ന് പരിശോധിക്കുകയാണെന്നും പൊലീസ് കൂട്ടിച്ചേര്‍ത്തു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ