പത്തനംതിട്ട : ശബരിമലയില്‍ നിരോധനാജ്ഞ നീട്ടി. അഞ്ചു ദിവസത്തേക്കാണ് നിരോധനാജ്ഞ നീട്ടിയത്. ഇതോടെ മണ്ഡല പൂജ നടക്കുന്ന ഈ മാസം 27 വരെ നിരോധനാജ്ഞ തുടരും. പമ്പ, ഇലവുങ്കല്‍, സന്നിധാനം എന്നിവിടങ്ങളിലാണ് നിരോധനാജ്ഞ പ്രഖ്യാപിച്ചിട്ടുള്ളത്. 

നിരോധനാജ്ഞ തുടരണമെന്ന് പത്തനംതിട്ട ജില്ലാ പൊലീസ് മേധാവി കളക്ടര്‍ക്ക് റിപ്പോര്‍ട്ട് നല്‍കിയിരുന്നു. ഇതിന്റെ അടിസ്ഥാനത്തിലാണ് നിരോധനാജ്ഞ നീട്ടി ഉത്തരവിറക്കിയത്. ഭക്തര്‍ക്ക് തടസ്സമില്ല, നാമജപത്തിനും വിലക്കില്ല. അതേസമയം പ്രകടനം, പ്രതിഷേധം തുടങ്ങിയ അനുവദിക്കില്ലെന്ന് പൊലീസ് വ്യക്തമാക്കി. 

നേരത്തെ പ്രഖ്യാപിച്ച നിരോധനാജ്ഞ ഇന്ന് അവസാനിക്കാനിരിക്കെയാണ് വീണ്ടും നിരോധനാജ്ഞ നീട്ടിയത്. തമിഴ്‌നാട്ടില്‍ നിന്നും മനിതി സംഘത്തിന്റെ നേതൃത്വത്തില്‍ സ്ത്രീകള്‍ ശബരിമലയിലേക്ക് വരുന്നു എന്ന റിപ്പോര്‍ട്ടുകളുടെ അടിസ്ഥാനത്തില്‍ സന്നിധാനത്തും പരിസരത്തും പൊലീസ് സുരക്ഷ ശക്തമാക്കിയിട്ടുണ്ട്.