തൃശൂർ :  യുവതിയുമൊത്തുള്ള അശ്ലീല ദൃശ്യങ്ങൾ പരസ്യപ്പെടുത്തുമെന്ന് ഭീഷണിപ്പെടുത്തിയ പണം തട്ടാൻ ശ്രമിച്ച കേസിൽ യുവാവ് അറസ്റ്റിൽ.  തൃശൂർ മുണ്ടൂർ കൊള്ളന്നൂർ പൊമേറോ പോൾസണെ (29)യാണ് പൊലീസ് അറസ്റ്റ് ചെയ്തത്. ആലുവ അശോകപുരം സ്വദേശിയിൽ നിന്നും രണ്ടര ലക്ഷം രൂപ തട്ടാൻ ശ്രമിച്ച കേസിലാണ് അറസ്റ്റ്.  

ഇരിങ്ങാലക്കുടയിലെ വനിതാ ബ്യൂട്ടീഷ്യനടക്കം മൂന്നു പേർ കൂടി കേസിൽ പ്രതികളാണ്. അശോകപുരം സ്വദേശിയായ അറുപത്തേഴുകാരൻ ഫെയ്സ് ബുക്കിലൂടെയാണ് ബ്യൂട്ടീഷ്യനെ പരിചയപ്പെട്ടത്. തുടർന്ന് ഇരുവരും നെടുമ്പാശേരിയിലെ ഹോട്ടലിൽ മുറിയെടുത്തു താമസിച്ചു. അതിനു മുമ്പ് ഇയാൾ 12,000 രൂപ യുവതിയുടെ അക്കൗണ്ടിൽ അടപ്പിച്ചിരുന്നു. 

പിന്നീട്  ഹോട്ടൽ ദൃശ്യങ്ങൾ സോഷ്യൽ മീഡിയയിൽ പോസ്റ്റ് ചെയ്യുമെന്ന് ഭീഷണിപ്പെടുത്തുകയായിരുന്നു യുവാവ്. ഇങ്ങനെ ചെയ്യാതിരിക്കാൻ രണ്ടര ലക്ഷം രൂപ കൂടി വേണമെന്ന് പൊമേറോ അറിയിച്ചു. തുടർന്ന് പരാതിക്കാരൻ പൊലീസിനെ സമീപിക്കുകയായിരുന്നു. 

പൊലീസിന്റെ നിർദേശപ്രകാരം പണം തരാമെന്ന്  പരാതിക്കാരൻ   പൊമേറോയെ അറിയിച്ചു. പണം വാങ്ങാനെത്തിയ യുവാവിനെ പൊലീസ് പിടികൂടുകയായിരുന്നു. ഇയാൾക്കൊപ്പമുണ്ടായിരുന്നവർ രക്ഷപ്പെട്ടു. കേസിൽ പ്രതികളായ ബ്യൂട്ടീഷ്യൻ അടക്കമുള്ളവർ കേരളം വിട്ടെന്നാണ് സൂചന. ചലച്ചിത്ര നിർമാതാവിന്റെ ഡ്രൈവറായ പൊമേറോ ഏതാനും സിനിമകളിൽ ചെറിയ വേഷങ്ങളിൽ അഭിനയിച്ചിട്ടുണ്ട്.