തിരുവനന്തപുരം: ഓഖി ചുഴലിക്കാറ്റിനെ തുടര്‍ന്ന് കേരള തീരത്ത് നിന്ന് കാണാതായവരുടെ പുതിയ പട്ടികയുമായി സംസ്ഥാന സര്‍ക്കാര്‍. പുതിയ കണക്കുകള്‍ പ്രകാരം 216പേരെ ഇനി കണ്ടെത്താനുണ്ട്. ഇതില്‍ 141പേര്‍ കേരളീയരും 75പേര്‍ ഇതര സംസ്ഥാന തൊഴിലാളികളുമാണ്. ഇവരില്‍ കേരളത്തില്‍ നിന്നുള്ള 141പേരില്‍ ഭൂരിപക്ഷം പേരെയും കുറിച്ചുള്ള അടിസ്ഥാന വിവരങ്ങള്‍ സര്‍ക്കാരിന്റെ വിവിധ ഏജന്‍സികള്‍ക്കു ലഭിച്ചിട്ടുണ്ട്. എന്നാല്‍ വലിയ ബോട്ടുകളില്‍ പോയ 75 ഇതര സംസ്ഥാന തൊഴിലാളികളെക്കുറിച്ച് വിവരമൊന്നുമില്ല. 

തിരുവനന്തപുരത്തു നിന്നാണ് ഏറ്റവും കൂടുതല്‍ പേരെ കാണാതായിട്ടുള്ളത്. ലത്തീന്‍സഭയുടെ കണക്കുപ്രകാരം കേരളത്തില്‍നിന്ന് 149 പേരെയും കന്യാകുമാരി ജില്ലയില്‍നിന്ന് 149 പേരെയും കണ്ടെത്താനുണ്ട്. രണ്ടും കൂടി ചേര്‍ക്കുമ്പോള്‍ 298പേരാണ് ഓഖിയെ തുടര്‍ന്നു കടലില്‍ കാണാതായത്. തമിഴ്‌നാട്ടില്‍നിന്നുള്ള നൂറിനടുപ്പിച്ച് തൊഴിലാളികളും കേരളതീരത്തുനിന്നാണു കടലില്‍പോയതെന്നാണു ലത്തീന്‍ സഭ പറയുന്നത്.