കോട്ടയം: ചെങ്ങന്നൂർ ഉപതെരഞ്ഞടുപ്പിൽ ഒരു പാർട്ടിയെയും ചാക്കിട്ട് പിടിക്കാനില്ലെന്ന് മുതിർന്ന കോൺഗ്രസ് നേതാവ് ഉമ്മൻചാണ്ടി പറഞ്ഞു. യു.ഡി.എഫിലേക്ക് മടങ്ങി വരണമോയെന്ന കാര്യം കേരളാ കോൺഗ്രസ് (എം)​ ചെയർമാൻ കെ.എം.മാണിക്ക് തന്നെ തീരുമാനിക്കാമെന്നും ഉമ്മൻചാണ്ടി പറഞ്ഞു. 

ചെങ്ങന്നൂർ നിയമസഭാ ഉപതിരഞ്ഞെടുപ്പിൽ യു.ഡി.എഫ് തികഞ്ഞ ആത്മവിശ്വാസത്തിലാണ്. പരാജയഭീതിയുള്ള എൽ.ഡി.എഫാണ് ആളെക്കൂട്ടാനും ചാക്കിട്ട് പിടിക്കാനും നടക്കുന്നത്. യു.ഡി.എഫിന് അതിന്റെ ആവശ്യമില്ല. ജനങ്ങളാണ് യു.ഡി.എഫിന്റെ പിന്തുണ. കേന്ദ്ര - സംസ്ഥാന സർക്കാരുകൾക്ക് എതിരായ ജനവികാരം ചെങ്ങന്നൂർ ഉപതിരഞ്ഞെടുപ്പിൽ പ്രതിഫലിക്കുമെന്നും ഉമ്മൻചാണ്ടി പറഞ്ഞു.

മാണിയെ യു.ഡി.എഫ് പുറത്താക്കിയതല്ല. സ്വയം മുന്നണി വിട്ടുപോയ അദ്ദേഹത്തിന് എന്ത് തീരുമാനവും എടുക്കാം. യു.ഡി.എഫിനൊപ്പം മാണി നിൽക്കണമെന്നാണ് കോൺഗ്രസ് ആഗ്രഹിക്കുന്നതെന്നും അദ്ദേഹം വ്യക്തമാക്കി.