കോഴിക്കോട്: പൊലീസ് കസ്റ്റഡിയില്‍ നിന്ന് പ്രതിയെ മോചിപ്പിച്ചത് അംഗീകരിക്കാനാകില്ലെന്ന് സിപിഎം കോഴിക്കോട് ജില്ലാ സെക്രട്ടറി പി മോഹനന്‍. ഇക്കാര്യത്തില്‍ വസ്തുതകള്‍ പാര്‍ട്ടി പരിശോധിക്കും. പ്രവര്‍ത്തകര്‍ക്ക് പങ്കുണ്ടെങ്കില്‍ നടപടി സ്വീകരിക്കുമെന്ന് പി മോഹനന്‍ പറഞ്ഞു.
ബോംബേറ് കേസില്‍ പൊലീസ് അറസ്റ്റ് ചെയ്ത പ്രതിയെ സിപിഎം പ്രവര്‍ത്തകര്‍ ബലമായി മോചിപ്പിക്കുകയായിരുന്നു. കോഴിക്കോട് പേരാമ്പ്രയ്ക്കടുത്ത ചെമ്പ്രയില്‍ വെച്ചാണ് പാര്‍ട്ടി പ്രവര്‍ത്തകന്‍ സുധാകരനെ പൊലീസ് ജീപ്പ് തടഞ്ഞുവെച്ച് 15 അംഗ സംഘം മോചിപ്പിച്ചത്. സംഭവം വിവാദമായതിന് പിന്നാലെ സുധാകരനെ പാര്‍ട്ടി പ്രവര്‍ത്തകര്‍ തന്നെ പൊലീസില്‍ ഹാജരാക്കുകയായിരുന്നു.
പാര്‍ട്ടി പ്രവര്‍ത്തകരുടെ വീട് ആക്രമിച്ച പ്രതികളെ പിടികൂടാതിരുന്നതിലെ സ്വാഭാവിക പ്രതികരമാണ് പാര്‍ട്ടി പ്രവര്‍ത്തകരില്‍ നിന്നുണ്ടായതെന്നായിരുന്നു സിപിഎം നല്‍കിയ വിശദീകരണം.കഴിഞ്ഞ വിഷുദിനത്തില്‍ സിപിഎമ്മും, ആര്‍എസ്എസില്‍ നിന്ന് തെറ്റി പിരിഞ്ഞവരുടെ സംഘടനയായ ശിവജിസേനയും തമ്മില്‍ സംഘര്‍ഷമുണ്ടായിരുന്നു. ഇതേത്തുടര്‍ന്ന് ഏതാനും പേരുടെ വീടുകളിലേക്ക് ബോംബേറും നടന്നു. ഇതുമായി ബന്ധപ്പെട്ടുള്ള അന്വേഷണത്തിലാണ് ബേംബേറില്‍ സുധാകരന് പങ്കുണ്ടെന്ന് കണ്ടെത്തിയത്. തുടര്‍ന്നാണ് പൊലീസ് സുധാകരനെ കസ്റ്റഡിയിലെടുത്തത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ