ന്യൂഡല്‍ഹി: പികെ ശശി എംഎല്‍എയ്‌ക്കെതിരെ ഉയര്‍ന്നിരിക്കുന്ന ആക്ഷേപം കേരള ഘടകം പരിശോധിക്കുമെന്ന് സിപിഎം പൊളിറ്റ് ബ്യൂറോ. ഇക്കാര്യത്തില്‍ നടപടിയെടുക്കാന്‍ കേരള ഘടകത്തോടു നിര്‍ദേശിച്ചുവെന്ന വാര്‍ത്തകള്‍ അടിസ്ഥാനമില്ലാത്തതാണെന്ന് പിബി വാര്‍ത്താക്കുറിപ്പില്‍ അറിയിച്ചു.
പികെ ശശി എംഎല്‍എയ്ക്ക് എതിരെ ഉയര്‍ന്നിരിക്കുന്ന പരാതികള്‍ കേരള ഘടകം പരിശോധിക്കുമെന്നും അതാണ് പാര്‍ട്ടിയുടെ രീതിയെന്നും സിപിഎം വ്യക്തമാക്കി. പരാതിയില്‍ നടപടിയെടുക്കാന്‍ ജനറല്‍ സെക്രട്ടറി നിര്‍ദേശിച്ചു എന്ന വാര്‍ത്തകള്‍ അടിസ്ഥാനരഹിതമാണെന്ന് വാര്‍ത്താക്കുറിപ്പില്‍ പറഞ്ഞു.
ശശിക്കെതിരെ പരാതി ലഭിച്ചിട്ടുണ്ടെന്ന് സീതാറാം യെച്ചൂരി നേരത്തെ വ്യക്തമാക്കിയിരുന്നു. കേരള ഘടകം ഇക്കാര്യം പരിശോധിക്കുമെന്നും യെച്ചൂരി പറഞ്ഞു. ഇതിനു പിന്നാലെയാണ് നടപടിക്ക് യെച്ചൂരി നിര്‍ദേശിച്ചു എന്ന രീതിയില്‍ വാര്‍ത്തകള്‍ വന്നത്.
ശശിക്കെതിരെ മൂന്നാഴ്ച മുമ്പു തന്നെ പരാതി ലഭിച്ചിട്ടുണ്ടെന്നും നടപടി തുടങ്ങിയിട്ടുണ്ടെന്നും പാര്‍ട്ടി സംസ്ഥാന സെക്രട്ടറി കോടിയേരി ബാലകൃഷ്ണന്‍ പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ