കൊച്ചി: മുന്‍ ജലന്ധര്‍ ബിഷപ്പ് ഫ്രാങ്കോ മുളക്കലിനെ അറസ്റ്റ് ചെയ്ത സംഭവത്തില്‍ പ്രതികരണവുമായി കന്യാസ്ത്രീയുടെ വൈദികനായ സഹോദരന്‍. സത്യം വിജയിക്കുന്നതിന്റെ ആദ്യപടിയാണ് ഈ അറസ്റ്റ് എന്ന് പറഞ്ഞ അദ്ദേഹം കന്യാസ്ത്രീയുടെ സമരത്തിനൊപ്പം നിന്ന എല്ലാവര്‍ക്കും നന്ദി അറിയിക്കുകയും ചെയ്തു.
മൂന്ന് ദിവസത്തെ ചോദ്യം ചെയ്യലിന് ശേഷം രാത്രി എട്ട് മണിയോടെയാണ് അന്വേഷണ സംഘം ബിഷപ്പിന്റെ അറസ്റ്റ് രേഖപ്പെടുത്തുന്നത്. മൊഴികളിലെ വൈരുധ്യമാണ് ബിഷപ്പിന്റെ അറസ്റ്റിലേക്ക് നയിച്ചതെന്ന് കോട്ടയം എസ്പി ഹരിശങ്കര്‍ അറിയിച്ചു. ബലാത്സംഗം, പ്രകൃതി വിരുദ്ധ പീഡനം, ഭീഷണിപ്പെടുത്തല്‍ എന്നീ വകുപ്പുകള്‍ പ്രകാരമാണ് ഫ്രാങ്കോയ്‌ക്കെതിരെ കേസെടുത്തത്.
ബിഷപ്പിന്റെ മൊഴികളില്‍ വ്യാപകമായി വൈരുധ്യം കണ്ടെത്തിയതിനെ തുടര്‍ന്ന് പരാതി നല്‍കിയ കന്യാസ്ത്രീയുടെ മൊഴി പൊലീസ് ഇന്ന് വീണ്ടും രേഖപ്പെടുത്തിയിരുന്നു. തിയതികള്‍ സംബന്ധിച്ച ആശയക്കുഴപ്പം തീര്‍ക്കുന്നതിനായിരുന്നു ഇത്. കുറുവിലങ്ങാട് മഠത്തില്‍ ഫ്രാങ്കോ മുളയ്ക്കലിനെ എത്തിച്ച ഡ്രൈവവറുടെ മൊഴിയും അറസ്റ്റില്‍ നിര്‍ണായകമായതായി അന്വേഷണ ഉദ്യോഗസ്ഥര്‍ വെളിപ്പെടുത്തി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ